Asür Khriesavizo o Bendangnungsang nüngtem nung nüngshilung ka saya

Kohima, Aenjeti 31 (TYO): State sorkari tetsür nem shilem 33 lemzükja ULBs indang elections agitsü lemtetba anema noktakdang taküm bendanga agütsü asür Khriesavizo Metha aser asür Bendangnungsang Longkumer na bilemteta tetushi agütsüogo.
Aenjeti 31, 2017 nü Dimapur nung Chief Minister T R Zeliang’er ki anasa nisung telok ka adenshia state sorkar anema lungkak aitdang police-i injang khalokja noktangdang lanur anaji khaset aser ano nisung aika yirutsü.
Iba mapang tentetba Joint Coordination Committee (JCC) aser Nagaland Tribes Action Committee (NTAC)-i tanü Kohima kübok Old MLA hostel junction nung sentong ka ayonga agi aser idangji asür ana nem akhüm agütsüba nüngshilung ka saya.
“Asenoki tanü noktaka aliba ali nung asenok asoshi taküm bendanga agütsür ana mang rema lir. Tenati taküm bendanga agütsüba atema asenoki tena dang sentsüh tulu lir” ta sentong anir Dr P Ngully-i ashi.
“Tena nüngtem nung yangluba nüngshilung yagi tenai bendanga agütsüba meyipa magütsütettsü saka iba yagi asenoki tena dang kanga pelar ta tamaitsü sayur” ta Dr P Ngully-isa ashi.
Sentong nung JCC Co-convener Luolao Usuo-ia tesenteper ajak dang iba anogo ya küm shia amungtsü ayongzük.
“Naga lennirtemi asenok temetentembo sama aoer ta meteta liaka, nübortemi aginüba aser sarasademba tonga meinyaktsür. Asen Naga lennirtemi Naga nunger temeten masü saka sen yong dang mapa inyaker. Iba tesempatsü mapa ya ochimashi lennirtemi dang inyakba masü saka Naga nunger ajak dena lir, kechiyong asenok nem asen lennirtem shimtsü atema tashi agüja lir,” ta Luolao Usuo-isa ashi.
Asenoki oshishir aser tebilemtsü abenba lennirtem shimtsü melena sen ang aginür. Anungji Naga nungertemi kanga dang shisa kaa sen tashi nem asenok mekokdaktsütsüla aser telemtetba tajungtem agitsüla, ta paisa ayongzük.
APO advisor Vilhusa Seleyi-ia o jembidang, tenati Naga nunger temetentem kümzüka ayutsü merangdang taküm bendanga agütsü, ta ashi.
“Tenati taküm bendanga agütsüba ajanga asenok tesentaktep akangshiogo aser ka akümtsü angatetdaktsüogo” ta paisa shisem.
“Tenati taküm bendanga agütsübaji amajok mekümdaktsütsüla. Tenati taküm bendanga agütsübaji asenoki teti bilemtettsü aser ozüng alema inyakba ajanga tajung kecha menguteter ta bilemtetdaktsütsü imlar,” ta tasür kinungertem tenüng nung jembidang Merenchiba Longkumer-i ashi.
Asür Khriesavizo teyi Ruopfukhrienuo Metha-ia o jembidang, “asen adianutemi Naga nunger atema taküm bendanga agütsüba bilemteta amungdang, asenoki sen yong masü saka ochi aser temeten atema inyaktsü tatishitsü angazükdi” ta ashi.
Iba sentong nung NTAC Convenor K T Vilie Theunuo aser Diphupar Naga Youth Organisation (DNYO) nungi teshimtet nübo kati tajungshi o tem jembi, DNYO-isa ken ka aten aser JCC Co-convener, Vekhosayi Nyekha-i anküp tepela o jembi.