Asür Marilyn Monroe indang tula ka $ 4.8 mn. agi yokogo

Los Angeles, November 18 (Agencies) : Actress, asür Marilyn Monroe meyong kanga tang nüngtugu sobutsü ka auction ajanga sen million dollar 4.8 agi yokogo.
Monroe temang nung kanga akang akanga teküp amai semtetba sobutsüji Brihostibarnü auction sentong ka nung ayok. Iba tula ya “Ripley’s Believe It or Not” indang museum chain nung yua liasü. Sen million dollar 4.8 agi ayokba tuluji alima nung auction mapang sen timtiba agi ayokba tula küma otsü tasen ka yangluogo, ta mirror.co.uk osang ajanga metetdaktsü.
Museum chain nung tatong tir, Edward Meyer-i, iba sobutsüji alima nung aliba nüngtugu tulatem rongnung nüngtugutiba lir, ta ashi.
Iba sobutsü ya alima tanga leni belener mao tsüngda “Ripley’s Believe It or Not” indang Hollywood kongsang nungsa yua atatsü akok.
“La tula dak ya mamatetba otsü keta lir. Iba auction ajanga Marilyn Monroe kechiba nüngtugu akümar meteta arutsü,” ta Julien’s Auctions nung executive director Martin Nolan-i ashi.
Lai iba tula ya 1962 küm New York City kübok aliba Madison Square Garden nung Democratic party atema tenla bendenba mapang ka nung asem. Iba sentong nung lai tesüiba mapang US Tir, asür John F. Kennedy atema Happy Birthday ken tentsü.
Monroe-i iba sentong nung shilem agibaji sürbo telok jakdang shilem magidangi lia ita ishika tang lir mozü overdose agi asü.