Asür Neiphretuo Metsieo tepsetba anema public sentong nung nisung aikati shilem agi

September 19, 2018 nü Kohima nung APO-i asür Neiphretuo Metsieo tepsetba anema lungkak aitba sentong agidang tangokba noksa ka angur.

Kohima, Rongjui (Septembe) 19 (TYO): Asür Inspector Neiphretuo Metsieo tepsetba anema tanü Kohima nung alirtemi timi lungkak aitba sentong nung kanga longsoa shilem agi saka nisung kari ozüng alema mapa inyakba ajanga tensa mejungi aküm.
Lungkak aitba sentong agiba sülen nisung kari District Jail raksatsütsü merang aser gari indang wind-shield jaksatsü.
Angami Public Organisation (APO)-i Angami Youth Organization (AYO) aser asür Metsie-o’er yimtsüng Chiechama Village Council den yaritepba public sentongji ayongzük.
Inspector Metsie-o ya September 7 nü Kohima nungi pa mapa lemzüka aliba Pfutsero sub-division kübok 5th Nagaland Armed Police (NAP)-i aodang sama aser September 15 nü Lasumi aser Zapami yimtsüngtem tsüngda pa mang angu.
Inspector Metsie tepsetba ken o nung tetsür ka dena nisung ana dak tongti süa tonglokja lir aser tenaji Yurreigam Ronra Shimray aser Ringthingchon Lungharwo na lir.
Tetsürla Lungharwo ji Manipur kübok Ukhrul nung apu aser Shimray ji Guwahati nung Railway Protection Force aser Assam Police-i apu. Tenaprong Nagaland-i anir aruogo aser SDPO(North) Kohima lenisüba kübok Special Investigation Team kati asüngdangya südar, ta Additional SP of Kohima, Tali-i ashi.
Tanü sentong nung Angami nunger dak alia Kohima nung aliba tanga kin balala nungi nisung aikati shilem agi. Parnok ajak Naga nunger sübotsü sübor Old MLA Hostel lenjem nung sentep.
APO tir Dr Kepelhousie Terhüja-i o jembidang, gari ka auyatsü atema ozüng akhümtsübuba senso ka tepsetertemji temetetertem aliba loktiliba nung densemtsü makok, ta ashi.
Sentong nung AYO tir Neinguvotuo Krose aser Chiechama Village Council Chairman Neitso Sogotsu naprongi khukhua aitsüba metetdaktsü aser tai tonglokja alirtem ozüng tesashi agi merenshitsü takhangba agütsü.
Old MLA Hostel lenjem nung sentong tatsüka ka agiba sülen lungkak aitertemi Chief Minister indang Office-i ao aser memorandum ka agütsü.
“Sorkari iba ken o bushisüngdang asüba osang ajunga metetdaktsütsüla. Tanga nisung kari iba mapa nung yaritepba aser shilem agiba onoki angazüka lir” ta memorandum nung shia lir.
APO-isa memorandum nung “state yimtiba nung enoka aliba CCTV camera ka dang mapa meinyaker. Anungji Kohima nung exit aser entry points aser talisa Manipur den arrtsülen CCTV camera tajungtem tangsa tang enoktsüla” ta takhangba agütsü.
“Ozüng alema inyaker ana dak ozüng tesashitiba agi merenshitsüla. Iba ken o nung kari danga meinprongra tebang mesüra aibelenertem bail nung chioktsü atema merangra, iba tebilemtsüji parnoki abentsü” ta APO-isa metetdaktsü.
Chief Minister nem memorandum agütsüba sülen lungkak aiter rongnung nisung kar tejashi nung Kohima District Jail kakpoka atutsü merang. Aibelenertem parnok ket nung agüjang ta takhangba agüja parnoki jail telungi aitsü merang.
Tejashi nung mapa inyakertemisa iba temeket nung aliba Bolero aser bike ka raksatsü. Ajisüaka, administration aser AYO volunteer temi parnok azüoktet.
Kohima nung aliba Tangkhul nunger amaktsü akok ta tsübua bilemba agi police-i jila telongtet nung aser talisa Don Bosco Road nung Mt Hermon School aser Midland nung Tangkhul Baptist Church tesemtem nung security akangshiogo.