Asür Sentilong tepsetba khukhua aitsür: AKTM

Dimapur, June 25 (TYO): June 23, 2017 aonung Mokokchung nung Asetkong Kaketshir Telongjem Mungdang (AKTM) züngsem tajung asür Sentilong tepsetba khukhua aitsür, ta AKTM sangdong ka nung metetdaktsü.
Asür Sentilong ji Asetkong kübok Mopungchuket yimer aser pa Nagaland University nung PhD azünger ka liasü. Pa tepsetba atema AKTM kanga aoksar aser taochi maketba inyakyim aitsür, ta AKTM Tir, Alapong T Jamir aser tongti tezülur, Jongshiyapang Aier nati sangdong nung shia lir.
Mokokchung Police-i iba tatalokba süoki ia bilema, ghonda ishika tsüngda nung asür Sentilong tepsetertem apuba atema tenüngsang agütsür. Mokokchung police aser ozüng amertemi iba ken o atema obendang shitak agütsütsü ta AKTM-i tamang akar, ta mendenpurtemisa shisem.
AKTM-i iba ken o kanga junga reprangdar aser onoki aibelenertem merenshitsü atema takhangba agütsür. Mokokchung nung ozüng amertemi temeten agütsütsü ta onoki amanger, aji mesüra onoki temeten atema mapa inyaktsüsa akümtsü, ta AKTM-isa sangdong nung metetdaktsü.
AKTM-i tasür kibong den asükhu lemsateper aser iba mangyimba mapang Tsüngremi parnok nem tesünep agüjang aser Tsüngrem kabo nung tasür tanüla anisüngzükjangma ta sarasademtsür, ta parnokisa shisem.