Asür sepai kibongtem den linük nüburtem lir: Kiren Rijiju

May 02, 2017 nü New Delhi nung aliba Palam Airport nung Minister of State for Home, Kiren Rijiju-i BSF Head Constable, asür Prem Sagar tasümang nung naro yutsüba noksa nung angur. 

New Delhi, May 02 (Agencies): Jammu & Kashmir nung aliba LoC nung Pakistan army temi tepsetba sepai ana kibongtem den linük nüburtem lir, ta tanü Mongolbarnü Minister of State for Home, Kiren Rijiju-i ashi.
Asür ana- BSF Head Constable Prem Sagar aser Indian Army, Naib Subedar Paramjeet Singh na nem akhüm agütsüba sülen minister-i, “Pakistan army temi ceasefire ozüng alema tepsetba sepai kibongtem den linük nüburtem dena lir,” ta ashi.
Delhi Airport nung Sagar nem naro akhüm agütsüba sentong nung adenba sülen osangbenertem den jembidang pai iba o jembia liasü.
Pa tasümang Uttar Pradesh kübok par yimtsüngi bener ogo.
Ano asür, Paramjeet Singh den asüpila sentong tanü Punjab kübok par yimdak agia liasü.
Yashi Jammu & Kashmir kübok Krishna Ghati sector nung Pakistan army temi India nunger sepai anaji tepsetba sülen tasümangji rangsaja liasü.