Asür Swuduve Nakro tepsetba atema ANTA-i takhangba agütsür

Kohima, September 4 (TYO): All Nagaland Taxi Association (ANTA) HQ Kohima-i state sorkar dang Swuduve Nakro tepsetba atema bushisüngdangtsü aser mapa inyaktsü takhangba agütsü.
ANTA HQ Kohima kübok taxi driver aikati tanü Kohima DC office kima nung adenshir asür Swuduve Nakro tepsetba anema lungkak ait.
Nakro ya taxi anishir ka liasü aser Honibarnü mejangjatetba nisung kari pa indang taxi hire süa anir ao. Ajisüaka, Honibarnü Chiechama Police-i pa indang tasümang angu saka pa indang taxi gariji mejangjatetba nisungtemi bener ogo.
Tanü nikongdang ANTA HQ Kohima kübok züngsemtemi Kohima Deputy Commissioner Rajesh Soundararajan aser Kohima Sr. SP Joseph Hesso na den ajurutep aser tezüluba nung takhangbatem agütsü.
Iba mapang Soundararajan-i ANTA züngsemtem dang district administration-i akokba tashi mapa inyaktsü aser bushisüngdangba mapang ANTA-ia police den amalitepa yariteptsü mepishia metetdaktsü.
Külen, Hesso-ia ANTA pur dang mokdangba mesüra iba mesükba sentong magitsü mepishia ashi aser police-i tajungtiba agi mapa inyaktsü ta nangzük.
Iba tatalokba atema ANTA HQ Kohima tir, Vibasetuo Solo-i ashiba agi, taxi driver temi hopta ka atema pei pei indang gari nung wako tanak enoker senzütsü.
Taxi driver tem tetsübu tia ka nung alir anungji iba atema sorkari mapa kar inyaktsüla, ta Solo-isa ashi.
ANTA-i Deputy Commissioner nem tezüluba agütsüba nung asür Swuduve Nakro tepsetba atema bushisüngdang asütsü shia lir.
Iba tatalokba ajanga taxi driver tem nem tarendakba, tetsübu aser terata ka bener arutsüogo. Asür Swuduve tepsetertemji hopta ka tsüngda aputsüla, aji mesüra ANTA-i state ajungalen lungkak aittsü, ta tezüluba nungsa shia lir.
Parnoki asür Swuduve Nakro’er kibong nem sorkari teyari agütsütsü ta takhangba agütsüogo.
Ano külen, Chakhesang Public Organization (CPO)-ia sangdong ka nung asür Swuduve Nakro tepsetba khukhua aitsür ta metetdaktsüogo.
Ozüng amertemi pa tepsetertem aputsü atema meranga inyaktsü aser public-ia iba dak sendakba osang kar danga meteta lira, sangoktsütsü mepishir, ta CPO-isa ashi.
CPO-i tasür kibong den asükhu lemsateper aser Tsüngremi nenok nem tashi aser tesünep moajang ta sarasademtsür ta sangdong nungsa ashi.