Asür Swuduve tepsetertem puogo; ANTA-i nisung tepsetertem meshi

Kohima, September 6 (TYO): Bodbarnü taxi anishir nisung noklang aika South Police Station Kohima nung adenshir asür Swuduve Nakro tepsetertem parnok ket nung agüjang ta takhangba agüja lungkak ait.

Asür Swuduve tepsetertem ta tai tonglokja nisung asem puogo aser parnok rongnung ka Zunheboto Police-i Hombarnü apu aser tanüngba nisung anaji tanü Kohima South Police Station nungi police temi apu.

Par asem apuba osang angashiba sülen Kohima nung taxi anishirtem tejashi nung South PS nung adenshi aser parnok ket nung nisung tepsetertemji agüjang ta takhangba agütsü. Parnoki police station telungia irr nisung asemji bushitsü merang saka IRB aser tanga police station tem nungi police nübo talila arusema parnok nokdangtet.

Iba sülen police ketdangsertem tiyongtsü ia jembitepba ajanga tensaji süngjemtet saka ANTA-i aibelener asemji bail nung mechioktsü aser par asem atema okatsürtemi bail atema mapa inyakra lendong ajurutsü ta kümdangtsü metetdaktsüogo.

ANTA-isa tasür kibong nem teyari agüjang ta takhangba agütsü aser asür Swuduve Nakro’er tanurtem Class X tashi sorkari teyari agüja züngdaktsütsüla ta shiogo.

Tanü Senior Superintendent of Police, Kohima, Joseph Hesso-i sangdong ka nung ashiba agi, September 3 nikongdang 2:00 ako meta Local Taxi (NL01T-9502) den kibur aser driver Swuduve Nakro September 2 nikongdang nungi samar mangur ta South Police Station Kohima nung ken o ka benok.

Iba osang angazükba sülen, police check gates ajak nung iba osang prokshi aser Nagaland nungdang masü saka Assam o Manipur nung aliba police station ajak nung lookout notice ka belenshi, ta Joseph Hesso-isa ashi.

Kasa anogo Chiephobozou Police Station dangi phone ajanga nisung tasümang ka Zhievü-zie, Chiechama anasa lir ta osang sangoktsü aser OC Chiephobozou PS-i anir police telok ka tesem tonga ao aser kinungertemi tasümangji asür Swuduve ta jangjatsü. Iba atema Chiephobozou PS nung nisung tepsetba ken o benoker bushisüngdang tenzük, ta Kohima Police sangdong nungsa metetdaktsü.

Bushisüngdanga arudang Hombarnü Satakha Police-i Toishe Aye (28) den samaba local taxi apu. Pa ya Zhesuho Aye’er jabaso aser ‘A’ Khel Colony, Satakha nung telidak lir ta jangjaogo. Pa den külemi taxi gariji Kohima police ket tongogo.

Kohima Police-i September 3 nungi 5 tashi bushisüngdanga arudang nisung ana apu aser tenaji Daniel Yimchunger (31) aser Avito Zhotso (41) na lir. Daniel ji Mukanchim yimer Lato Yimchunger’er jabaso aser Supply Colony, P.R Hill Kohima nung telidak aser külen Avito ji Jakhama yimer Nezel Zhotso’er jabaso lir aser Upper P.R Hill Kohima nung telidak lir ta jangjaogo.

Daniel Yimchunger’er ki mita reprangdang NSCN(K) ajanga agütsüba vehicle Tax (2017-2018) indang shidi 83 aser GPRN(K) ajanga agütsüba union traders & contractors (yearly tax of 2017- 2018) blank information slips aliba apu, ta Kohima Police sangdong nungsa shia lir.

Maneni, police-i Avito Khotso indang Maruti Alto 800 (NL01H/9287) apu. Iba gari ajanga parnok September 2 nü Satakha-i ao aser tasüngji Kohima-i meyipa aru.

September 2 aonung 8:00 ako meta Toishe Aye aser Daniel Yimchunger nati PHQ Point Kohima nungi Local Taxi ji Wokha aotsü atema hire asü. Parnok Zhievü-zie, Chiechama Village atongba sülen Toishe aser Daniel nati Taxi anisang Swuduve dang gari anenang ta ashi aser iba sülen Toishe-i pistol ka agiteter Swuduve amokmeren.

Ajisüaka, Swuduve-i pa amokmeren yonga metsübui tena den raratepdang pistol ali nung tsük, saka idangji Daniel-i Swuduve indang tekolak nung süngten kati akoh aser idangjisa Swuduve atanga asü.

Toishe aser Daniel nati asür Swuduve mangji marketing shed tsünglanglen yutsü aser tena Tseminyu-i ao. Idakji tenati Avito den phone ajanga Tseminyu-i arutsü aja aser Avito Kohima nungi Tseminyu atongba sülen par asem Satakha-i ao. Idakji Toishe den parnok auyaba Taxi ji yutsü aser Daniel o Avito na September 3 nü Kohima-i meyipa aru, ta sangdong nungsa shia lir.

Toishe aser Daniel nati police tsüngdang tenati local taxi auyatsü tasa atongba aser nisung tepsetbatem nangzükogo,  ta Kohima Police-i metetdaktsü.

Toishe Aye ya NSCN (K) nung captain lir aser anaben tashi police tsüngdang pa anema ken o benoka lir. 2008 küm Mokokchung nung prangpong-injang abenba atema aser kaji 2013 küm South P.S Kohima nung tashiyim agi sen saruba atema lir.

Daniel Yimchunger ya NSCN(K) nung 2nd Lieutenant lir aser 2011, 2012 o 2013 nung South P.S Kohima nung pa anema tashiyim agi sen saruba aser prangpong-injang abenba indang ken o tem benoka lir.

Avito Zhotso anema South P.S Kohima 2011, 2012 aser 2015 nung tashiyim agi sen saruba, auyaba ken o tem benoka lir.

Tanü par asemprongla Chief Judicial Magistrate, Kohima dangi anir oa ken o benok aser okadaki parnok police ket nung ayutsü temelaba agütsüogo.

Kohima Police-i iba ken o atema jungjunga bushisüngdangtsü aser aibelenertem tapet temerenshi agütsütsü atema kulitem bendentsü, ta Senior SP-isa sangdong nung metetdaktsüogo.