Asür tenüng züluokdang Aadhaar card meshitsü

New Delhi, August 04 (Agencies): October 1 nungi tenzüka asür tenüng züluokba (registration of death) mapang Aadhaar number meshitsü, ta sorkar-i renemogo.
Home Ministry ajanga Hokulbarnü sangdongba osang ka nung ashiba agi, Jammu & Kashmir, Assam aser Meghalaya dak alaka tanga state ajunga nung iba sentong ya October 1 nungi tenzüka amshitsü aser item state asem atema anogo balala sangdongtsü.
“Asüba tenüng züluokba mapang asür indang tejangja metettsü asoshi Aadhaar number ya October 1 nungi nüngdaktsü,” ta Home Ministry ajanga sangdongba nung shia lir.
Nisung kati asür indang death certificate meshidang Aadhaar number mesüra Aadhaar enrolment ID Number (EID) magütsütetra, pa mesüra lai asür indang Aadhaar number mali, ta kuli tejangja agütsütsüla.
Iba kuli ya tai agütsüra Aadhaar Act, 2016 aser Registration of Birth and Death Act, 1969 kübok aibelener ka ama kümtsütsü, ta Home Ministry ajanga tekümdangtsü shisem.
Aadhaar amshiba ajanga kinunger mesüra adianutemi kuli agütsüba tejangjaba kümdaktsütsü, ta Home Ministry kübok aliba Registrar General indang office ajanga ashi.
“Nisung ka identity tim masüba nung amshiba nungi iba sentong ajanga nokdangtsü. Iba ajanga asürtem indang record tejangja bendena yutettsü. Maneni iba ajanga asür ka atema document aika menüngdaktsü,” ta Registrar General ajanga shisem.
State aser union territory ajunga nung tanur asoba aser asüba indang kuli kaket agütsüba department dang iba sentong tasenba ya September 1, 2017 tashi nung renemer alitsü asoshi Registrar General of India ajanga totuyuba agütsüogo.