Asür W. Chubanungbai züluba chirnurtemi meyipzükba kaket ana saya

Asür W.Chubanungba Aoi züluba chirnurtemi Engraji oshi nung meyipzükba kaket ana tsürabur, M.B Longkumeri sayatsür külen sentong nung tongti shilem agirtem külemi tangokba noksa nung angur. (Mokokchung,  July 17, 2017)

Mokokchung, July 17 (TYO): Longkhüm yimtiba nungi asür W. Chubanungba Ao sor July 17, 2017 anogo küm noklang abensaba den repsema pai taoba mapang Ao oshi nung zülubatem par chirnurtemi Engraji nung meyipzüka adokba kaket ana Hombarnü tsürabur Wb. M.B Longkumeri meraketa sayatsüogo.
Mokokchung Town Baptist Arogo pastor Rev. Ponen Longchar ajanga iba kaket meshiteta sarasademtsü.
W. Chubanungbai züluba kaket ya par jabaso Prof. Limawatii yaria jala Wt. Aoyanglai Engraji nung meyipzükba kaket anaji; Havildar Watingangshi Ao Longkhum – Off the coast of Tunis 1917 aser kaji Wabong Senkalemba Bem – An account of his life na lir. Iba kaket ana ya Mokokchung town kaket ayokba dokantem nung angutsü.
Temenungratsüka tanü iba sentong nung asür W. Chubanungba kinüngtsü Wt. Bendangsenlaia mapang tatsüka agia mulungnen o lemsatep. W. Chubanungbai toktsür aoba tang akümlirtemji pa temeim kinüngtsü den jabaso 2, jala 6, semchir 25 aser tanaben semchir 8 lir.
Taoba Deputy Inspector of School (DIS) asür W.Chubanungba ya Longkhum yimdak 1917 July 17 nü aso. Pa ya American Baptist Mission English Middle School Impur, Christian High School Jorhat, St Paul’s College Calcutta (1941), Fazl Ali College Mokokchung (B.A 1964), Regional College Bhubaneswar (B. Ed 1967) rijutem nung züngtet.
Pa ya British yimsüsüba mapang Sub-Divisional Office Mokokchung nung Clerk mapa inyaka liasü. Aji sür, pa Government Middle School Chuchuyimlang nung Head Master nungi tenzüka atuba Deputy Inspector of Schools nung tashi inyaka sodi agi. Iba den ano pa ya Nagaland Public Service Commission nunga züngsem ka liasü.
Pa taküm alidang, pai Ao oshioben aser kaketkeno renlokba nung shilem tulu agia kaket tajung kar zülua yuja lir. Item rongnung nüngtugu Pentojepjep Ritsüng (1949) densema Tetenzükba Ao Grammar (1962), Ao Kaketshir Mungdang (AKM) Tenzükdak Longkhüm (1979), Ritu Yimtuk Longrar (1992), Tunis Tzüküm -1917 World War I Dawai Aor Otsü (2002) aser Senkalemba Taküm Otsü (2002), aser pa ya sangro mejemer tajung ka liasü, ta angazüker.