Asür Watsü Imkongangla alima nungi pilaogo

Dimapur, Nov. 10 (TYO): Tanep November 10, 2017 anepdang 1:00 ako meta Watsü Imkongangla (Molungyimsen) Dimapur nung lia iba akumli wadang temer teti alitsuba limai ogo. Asur Takuangshi Tzüdir aser asür Ngangshi Sanglitsür na chir parnok ter rongnung la tanutsütila liasu. La arishi küm 81 buba nung iba lima toktsür aor.
Asür Watsü Imkongangla ya 1936 küm Molungyimsen nung aso. La lanuwa Upper Primary School Molungyimsen, Changkikong School Dibuia aser Naga National High School Mokokchung nung azüng. Ajiser Jorhat Christian Mission Hospital (JCMH) nung nurse training agir mapa inyaka lia Mopungchuket nunger asür Dr. Ngangshi Aier den kibong aküm. Idakji 1961 tashi mission mapa inyaka lir kasa küm Impur-i tuagi Mission Hospital nung küm 28 tashi mapa inyaka ali.
Asür Dr. Ngangshi Aier, Impur Mission Hospital nung mapa inyaka alidang Mrs. Imkongangla arogotsür ‘Tetsur Tamangtir’ telok nung küm 18 Secretary inyak. Iba mapang lar teloki shilumanemertem aser timtemertem semdanga sarasadem aser akokba teyari balala agütsü.
Kinungbu Impur Mission Hospital nung küm 28 inyaker anisüngzüka alitsü sentong yanglua alidang ano JCMH nungsa Medical Superintendent inyaktsü atema CBCNEI-i mepishi. Idakji par kibong küm pezü ser tesadang nüburtem tenzüka lir Mopungchuket yimdak anisüngzüka alidang Dr. Ngangshi Aier kibubai anir ao.
Kinungbu sür külen lar jala jabasotem den Mokokchung, Kohima aser Dimapur nung jangratema lir tanep iba alima toktsür ogo.
Tanü Hokolbar nikongdang 1:00 ako nungi Dimapur Ao Baptist Arogo (DABA) sannüker Rev. Kikai ketdangsüa Kashiram kiyong nung asüpila sentong agi. Iba mapang o jembir balalai asür Imkongangla ya chichiba bendanga agütsüba tetsü ka liasu ta kuli tejangja lemsatepa liasü.
La taküm junga alidang Mrs. Imkonglai kanga ajemalua la kinungbu den teka amteper yaritepba arubayong la kinungpu Dr. Ngangshi Aieri Missionary Doctor mapa inyakba nung takok tulu angu aser par mapang nung kanga dang nüngtugu Doctor ka küma liasu, ta Rev. Kari Longchari anir o jembirtem aikati khuli asü.
Mopungchuket Senso Union Dimapur aser Molungyimsen Senso Union Dimapur natia khuli tajung aika agütsü.
Molungyimsen Arogo Sannüker, Deacon, Village Council Chairman, Council membertem , kinüngertem jenti, Molungyimsen aser Mopungchuket nunger aruagi asür kibong semdanga o tajung jenti jembia liasü.