Asür Yashitsüngba Ao den asüpila sentong agir pa mang remogo

Dimapur, Rongchii (April) 4 (TYO): Rasemnü (Bodbar) Dimapur state stadium nung shishilemar mongin aser lokti atema mapa inyaker asür Yashitsungba Aier den asüpila sentong agi.
Asür Yashitsungba Ao ya Eden Medical Centre, Dimapur nung mapang tatsüka temang manemi anepalua aruba sülen yashinep alima nungi pila aser tanü nisung noklang aika pei sobaliba sübotsütem sübor adenshia pa nem akhüm tetushi agütsüogo.
Dr. Maongwati Aier-i tebu indang taküm otsü tatsü ka lemsatepdang, tebu dak tensa mapang melenshiba den tsüngsü medema anidaktsü sempet tajung liasü ta ashi.
Kechi tia ajurudir ajuruaka pai itemji ajangtet aser pa sorkar contractor ka küma mapatong aika takok ngua inyaktet, ta Dr. Maongwati-isa ashi.
Nagaland nung medical wadang tsütsü metokmeperi aika aliba ajiteta pai iba nung temulung agütsü aser pa indang alizüngji medical services tajungtiba agütsütsü atema liasü. Nisung aikati temang anepalutsü atema state adena moutetba khuret angateta pai medical reju ana- Zion Hospital & Research Centre aser Eden Medical Centre lapok, ta Dr. Maongwati-isa metetdaktsü.
Asür Yashitsungba ya ochishir ka aser naloknara kecha maliba nisung ka liasü. Pai sensaker aser nüngdakbapurtem atema kanga aria bilem aser pai kanga meranga yariba ajanga tanü nisung aika taküm kümzükogo.
Eden Medical Centre (EMC) nungi Dr. Moatoshi-ia o tatsüka jembidang, asür Yashitsungba ya tangar yarinüba nisung ka liasü aser pai pa mapa inyaker atema kanga aria bilemtsü aser ajungmeso, ta ashi.
Pa ya alizüng tajung ayuba nisung ka liasü aser pai nübortem yaritsü atema kanga jangra. Iba jagi pai kanga dang tasü itta medical centre ana lapok, ta Dr. Moatoshi-isa shisem.
Zion Hospital & Research Centre Director, Dr. Athikho-ia ashiba agi, “asür Yashi Ao ji dang role model ka dang masü saka pa mapatem ajanga ochishitsü aser akhümketa alitsü atema tangartem ajungmesor ka liasü.”
“Pai toktsür aoba senmangji kodang mamatsü aser onoki pai meranga inyakba, ochishiba aser ajemalua aliba ajizüka benshitsü. Pai meimchir tenzükba mapa anünga yutsübaji onoki tembanga inyaktsütsü” ta Dr. Athikho-isa shisem.
Asür Yashitsungba dang Y Ao ta aja aser pa ya sentilung ka ama liasü. Pa ya tesayur tajung ka, shisalen sayur ka aser mangdang akaba tesüngjem meimchir ka liasü. Tangar yaritsü atema pai teti renema dang liasü aser pa tango satem tashi pa tangatetba nungi masetshii noktak, ta par jala kinungbo Tushi Wungtung-ia ashi.
Sentong nungsa Nagaland Governor P B Acharya, Nagaland chief minister Neiphiu Rio, Minister G Kaito, Ao Baptist Arogo Mungdang, Ao Senden aser Asetkong Mungdang nungi mangyimba osangtem zünga metetdaktsü.
Sentong nungsa Dimapur Ao Union, Dimapur Süngratsü Union, Dimapur Asetkong Union, Süngratsü Baptist Arogo, Nyamo Lotha colony (Khermahal) aser Nagaland Foot Hill Road Coordination Committee nungi teshimtet nübotemi asüpila o jembi.
Sentong nung DABA Associate Pastor Rev. I Wati-i temoatsü meshia sarasadem, DABA Pastor Rev. Dr. N Tzudir-i o tatsüka ka jembi aser DABA Associate Pastor Rev. Lima Jamir-i sentong tembanga sarasadem.
Iba sülen pa mang Naga cemetery-i bener oa arem.