Asürtem atema mangyimtsü sorkari memelunger: Opposition

New Delhi, December 08 (Agencies): Sen agi anüngba ajanga nisung 100 dak tema asürtem atema mangyimtsü asoshi sorkari memelungbaji taaktsüka lir, ta tanü Rajya Sabha nung opposition züngsemtemi ashi.
Tanü Rajya Sabha senden tenzükba sülen opposition aser treasury benches na tsüngda raratepba ajanga minute ishika tsüngda senden thinen.
Opposition lenir, Ghulam Nabi Azad-i o jembitsü nokdakdang BJP züngsemtemi sorkari sen anentsüba onük nung maneni o lemteptsü atema takhangba agüja yimyim ayima liasü.
Ano Finance Minister, Arun Jaitley-ia telangzüba agütsütsü atema nokdakang opposition züngsemtemi longkak aita yimyim ayim.
Rajya Sabha Chairman, Hamid Ansari-i sendenji azüoktsü merang saka treasury Bench aser opposition züngsem napronglai rongrong adokba ajanga pai anüngdang tashi senden thinena liasü.
TMC MP, Sukhendu Sekhar Roy-i, Ato kilonser, Narendra Modi-i sen 500 aser 1000 notes anentsüba sülen anogo 30 tsüngda nisung 115 süogo, parnok asüba bilemteta senden nung mangyimtsüla, ta ashi.
Pa o jembiba metembangdangyongi Information & Broadcasting Minister, Venkaiah Naidu-i, “Iba ya politics lir. Iba onük nung o lemtepdi. November 8 nü ya putisütsü anogo ka lir,” ta ashi.
Naidu-isa, anogoshia mazüok opposition züngsemtemi senden nung rongrong adokdaktsür, ta aitsü.
Azad-i jembinüa liasü saka Treasury benches nungi züngsemtemi ibaji anema nokdak.
Hamid Ansari-i, House Lenir aser Opposition Lenirtemi jembinüdang jembitsüji benshia arur, ta ashi. Paisa Azad nem jembitsü temelaba agütsü.
Azad-i, sorkari mapatong tai benokba ajanga tesüiba ita ka nung timtem balala ajurua aluyimer, tetsürtem, lanurtem aser teintet rogo nisung 100 dak tema süogo, ta ashi.
“Onoki iba House-i asürtem atema mangyimtsü benoker, saka sorkari memelunger,” ta Azad-i ashi.
Paisa, ibayongji Lok Sabha aser Rajya Sabha na nungi party 16 nungi MP 150-i Parliament House kima Gandhi kürakayanglu anasa ‘Black Day’ among, ta ashi.
Azad-isa, asürtem atema mangyimtsü melen sorkari yirua aliba zübo nung metsü inoktsür aser iba ya taaktsüka lir, ta ashi.
Congress lenirisa, Nüburtem ket nung sen mali, ajisüaka sorkari sen peria agütsür ta jembir, ta sorkar aitsü.