Asus-i smartphone asem sayatsü

New Delhi, July 30 (Agencies): August 6 nü amungtsü aliba “Zen Festival” mapang Taiwan nung mobile phone yanglur Asus company-i smartphone asem den tanga oset kar dena sayatsü ta Brihostibar nü metetdaktsüogo.

Parnoki sayatsü aliba smartphone asemji ZenFone 2 Deluxe, ZenFone Selfie aser ZenFone laser.

“India market nung shilem agitsüji anogo shia tasakba akümer anungji onoki yangji takok ngua shilem agitettsü asoshi tangar dang nungi balaka inyaktettsüla. Onoki Zen benjung nungji onok meyong oset aika sayatsü aser iba mapang item oset jenjanga metetdaktsü,” ta Asus managing director Peter Chang-i ashi.

Onok company-i India market ji tapu asemsü nungi repranger: selfie sapurtem, jenjang tajemba agi oset aginertem aser oset tajung aginertem.

Tan tasenba Deluxe phone nung ya Asus-i tanga company dang nungi tama yanglutetba 4GB Ram inoktsü aliba dang masü saka tanga phone dang nungi tapuba asütsü aser phone tesülenji ‘crystal miracle design’ enoka alitsü.

ZenFone 2 Laser nung ‘laser auto-focus’ alitsü aser mezüng adokba ‘first generation ZenFone’ tajungba küma yanglushiba amai asütsü.

Selfie phone jibo pei sasa noksa agitsü kanga sapurtem asoshi ataka yangluba lir.

Chang-i Zen phone tem nung aliba battery tem koma ser talangba aser tajungba amshitettsü ibaji asoshia tasa kar metetdaktsüogo.