Yashi, tanü aser asüng Ao Oshi jenjang

–   Rev. C. Walu Walling.

(Iba onük ya Alima Lisopur Anogomung, Rogonü, Lurui 9, 2019 (August 9, 2019) nü Dimapur nung Tir Yimyim-i ayongba sentong nung jembiba neburtem rongnung shisalemsateptsü asoshi adoktsür)

Okila:
Alima nung kin ka aliba temaitsü aser kuli tulutibaji oshi ya lir. Kin ka asoshi oshi ya nisung o nisung na tsüngda angatetteptsü kija atema dang masü, saka ibai par kin sobaliba aser lipok tamentakdak kimungji lir. Oshiji kin ka maitsü ayak, kobai pei kin meraket aser shisangrenji alima dang sayur. Ao kin kenozüluji Missionarytem senmang ta ashitsü akok.
Shirnok dang Indigenous people ta ajar? Parnokji shir aser non- Indigenous people ji shirnok? Indigenous people jagi kechi oshi jembir, aser non- Indigenous people pur jagibo kechi oshi ang jembir? Ao kinji Indigenous asü non Indigenous, itemji lanuasensortemi taroki ia bushitsü wadang ka yutsüdi. 1982 nungi tang tashi UN-i Lurui 9 ya Lisopur anogo ta sangdonger amunger süra Lisopur aser Lisopur masür tetsüngdaji kechi, tajangzük aser takoksajia kechisa.
Indigenous tetezü asenoki koma rateter? First peoples, Aboriginal peoples or Native peoples, …https://en.wilkipedia.org/wiki/. Indigeneous people. “from to born in a specific place, Originating or occurring naturally in a place, native” (Latin indigena a native). Asen oshi nung yamai ashitsü akok: Mezüngpurtem Lipuyimpurtem, Yimkümertem, ali kiburtem mesüra Lisor/Lisopur/Yimsoyimlir ta item rongnungji tapetba tenüng jar, tenüng dak jaloka nüburtem asoshi mapa inyaktsü tenüngdaktsü.
Tanabuba nung, shirnok dang non-Indigenous ta ajar ta süra parnokji tesü arurtem, ali aser kimunglumong makartem, yimmakertem, tashiyim amshirtem, jenlokpongloker ta yamalaji ajatsü akok. Akodong amungi aruba ama. Yagi süngdong tulu Laküp-Ari aser yamala süngdong tulu nung mezüngbo nükdong tilaka nung arua atemtsü, saka tanem tanemi süngdong tulubato tarakzü majung amokbanger ali temo ajakji mesepa oda oda süngdongji alenseta südaktsür iba manungji süngkhu tulu küma ainer, aji oda mezüngpurtemto tanem tanemi pei ki nungi aenshia aotsüsa kümdakja pei yim, pei temeten ajak okshia samaba den külemi par oshia samatsüsa kümadaktsüba telok dangji Non-Indigenous ta ajatsü asü?
1993 küm to United Nation-i Year of Indigenous Peoples ta sangdongba sülen ano 1994 – 2004 United Nation Decade of the World Indigenous Peoples ta sangdonger item nisungtem atema terenlok mapatem inyaka aruogo südi. Ao kinbo iba dang nungi tera tekaraba nungi tenzüka Decade ana dak alia Ao oshi mangatettep nung jajayonga aruogo. Item mapang indang bilemtetdangbo, Ao oshi koleni aor? Ao oshi samadisü na? Aor Aotsüri Ao oshi meima jembia zülutetdi ma ta shisabulu khuret bener Tsüngrem dang sarasadema aruogo. Ao oshi item ajak ajanga jajayonga arudang Tsüngrem teyari bilemteter, aser tanüa Tsüngrem teyaritem atema tenüng asanger.
Ao Oshi Yashi, Tanü aser Asüng Jenjang:
Ao oshi jenjang asadangtsü mapang meshiogo ta bilema lia, iba sentong mapang den peta ayongzükogo ta tayonger Tir Yimyim dang pelar. Lisopur Oshi indangji toktsür Ao oshi jajayonga aruba den tarutsü nükla indang aroka lemteptsü ya mapang tajung. Onük nungji Ao oshi jenjang asem lemsar bilemdangtsü agütsüogo. Ao oshi jenjang asemji tongmelang agi yamai lemsadi:

Mezüngbuba nung Yashi Ao Oshi jenjang:
1876 – 1954 (küm 82) iba dangji asenoki yashi ta ajatsü akok. Yashi Ao oshi indang reprangdangra, Ao oshiji kibong tajung ka nung asoba tobur tajung aiür, temulung tesadem, ajak den kasa jaklatetba, tereprangnütsüsa anükalem yimya aketba ama liasü. Yimer dang masü ora alir pi bendang ter-i la nükshia reprangba ama, küm 82 ji Lotha, Sema, aser Tzüla Ayong ajanger alir kin aikati Ao oshi angazüka jembia aser züluyu balala rizünga ayuba tensa ka.
Kenozülu aser iba wadang nung ABAM-i tongti shilem agia aruba mapang. Ao sünak abener ajak teka amteper jangyumedema aru. Iba mapang pi kini Ao oshi meteta jembibaji par nisungtemi “Hait! yabo tesüngmangtsü ato” ta nükshitepba liasü. Yashi Ao oshi nungji tashishitep kecha makai, ibai ang shitak, ajibo tai, X,Y,Z,Ü- i aibelena züluba atema sen achi/aka chi; yabo ozü oshi, ajibo par oshi, ibai ang agitsü, ajibo magitsü ta jembiba kecha züluyu nung munguka mesüra mangashika.
Iba tensa nungji Ao oshi agi Ao oshi jembir ajak arakmoka anir arudang, tamangba yimsü aser libaliru nung temelenshi aika bener arutsü. Khristan yimsü amanger aser akhi tsürabur yimsü amanger tsüngda mangatettep adokba tesem tesem nung alitsü, saka Ao oshi renlokba nung iba jagi kenü danga timtem magütsü. Talisa ibai tashi tait Ao Komiti ka shimer aruba ajanga takok ngua aruogo ta 1924 Ao Mungdang Lemtet nungjagi angateter. Yashi Ao oshi nung maitsü lungzüngji 1911 Ao Naga Dictionary Dr. E.W. Clark-i adoktsübaji liasü
Yashi Ao oshiji kanga tenükshitsü ka. Oshi ajanga kin ka lungjemdaktsür ta oshi nung mongintemi jembiba aser zülubaji shitak ta kinük aika nungi kuli sayutetogo. Yashi Ao oshiji Ao oshi meimer ajaki kanga ketasena, meima aser iba oshi ajanga yim o yim na, temba tinu, kidanger den telungjem aser yimjung yanglua ajak den merang apu ama tesendaktep tajung nung aru. Ano olen ka nung ibai Yisu yimsü osangtajung ajanga bener arutsüogo. Kechiaser Yisu yimsü osangtajungji ammang ain ajak ateta or ajak sangwadaktsüba Tsüngremer ainji liasü.
Alima nung oshi ajak putu aser tensa mapang den apet tajungba melenshiyonga aruba den atongsema Ao oshia jajayonga aruogo. Tanü Ao oshi kechi jenjang nung noktaka lir, aji yashi Ao oshi ajanga yanglua yutsüba oshi Kimung tamentakdakji lir. Iba kimung majangi tanü Ao oshi mera tasen agia apumesotsü tamakoktsü asütsü.

Tanabuba nung Tanü Ao Oshi jenjang:
Tanabuba nung 1955 – 2019 (küm 62) iba dangji tanü ta ajatsü akok. Ao oshi küm 62 jajayonga aruba nungji Lisor nisungtemi Ao oshi terenlok asoshi tongti shilem agiyonga aruogo. School nung tazüngtsü kaket adokba, Ao Oshi Class 10 aser 12 (MIL) final tashi agiba, Ao Senden-i Literature Board tenteta iba Board ajanga Ao Oshi terenlok asoshi tejangrartem atema Arangtet Tatidang agia Ao oshi nung, Certificate, B.A. Diploma aser PGD tashi anebalua agia arudar. Parnok dang aseni peladi.
Tanü Ao oshi kong noktaka lir, aser asüng asoshi kechi koma kolen meratemji agiba ajanga tetsükdaktsü kecha makai bener otettsü, iba khuretji aroki süoki ia bilemtsüla. 1994 – 2004 küm 10 alima ajak nung Lisor Oshi nung rangloker UN ajanga mapa inyakdangto Ao oshia terenlok asoshi jenjang kar danga agitet asübo, iba dang nungi tera temaba tajungba nung lila ta sasaseta bilemer. Alima kin balala otsüren timtem ajurua kin ka ajonga külemi tesama tiai aiba otsütem ama, Ao oshi atema 1988 – 2004 ji tammang tia ka nung aruogo. Item indang lepshia jembitsü menüngdak, saka ibai Ao kin kenozülu nung maidoktetba tensa liasü. Ibai kin ka oshi nung teshimtet ishikati kibur kümdi ta merangba ajanga atalok. Itemji parnok sasa shimteter inyakba masü, saka lokti-isa shimteter inyakdaktsüba lenirtem liasü.
Tanüa mekümdangra telok kari oshi madak kibur küma nübur madak tashi amshitsü kecha memenu. Ibaji Ao oshi meimer ajaki süoki ia shisadangtsü atema. Oshi ka terenlok aser tejakleni aotsü atema ajaki teka amteper inyaktsü tenüngdaktsü. Bihar nung Maithily oshi jembir aser zülur 1860 tashi nungbo nisung million 16 dak tali liasü, saka iba oshiji Hindi agi melener aruba tangbo Maithily oshiji meshimeshia samaogo ta ashir. Maithily oshi samaba ama tanü sama-a aoba aser aotsüba oshitem rongnungji mekümdangra Ao oshia adentsü. Alima mesama tashi Ao kin alitsü, saka Ao kini Ao oshi mejembira Ao oshibo samatsü. Süra ibaji shir dak tongloktsütsü?
Oshi agi lokti tentet ajak lungjemdaktsür. Ao kin kenozülu wadangji Impur nungi shilem tulu agia aruogo, saka Impuri Ao oshi aser kenozülu madak tashi kodanga mamshi. Iba jagi Ao oshi nung terenlok aser tejakleni odaktsüba nung dang shilem tajung agia aruogo. Tanü Ao oshi atema ABAM-i Aor lokti tentet ajak den amalitepa aruogo. Iba onük jembira ABAM tenzükba kenozülu wadang nung lenirtem sülen tanitaker ka süa arudang Ao oshi nungbo lokti ajak den angatettepa aser yaritepa aruba bilemteter.
Nüburtemi zülumen tsütsü Laishiba aser Osangtajung Ken Kaket nung alibaji dang agitsü ta ola adokdanga tanemi item dang Laishiba aser Ken Kaket nung zülumen meputepi lirji melenshia arurji, nüburtemi aginüba ama melenshitepa odi ta jembia, aser yamaji inyaka aruogo. Iba den külemi temelenshiji kong kechi nungsa nüngdaker, tajitetbatemji tanishirtem den angatettepa melenshiyonga inyaka aruogo. Saka zülumen tsütsü tashiyim amshia kodanga inyaka maru.
Tanü Ao oshi atema tesasatsü tulutibaji SCERT ajanga adokba Heritage study nung Ao kin otsü medensemba ya asütsü.
Tejakleni aoba kin otsüji yamai dang asütsü na. Tenzükba maparen nung nisung shia yayim balala agi loktiji tenzükerji, tip külen nungi dang reprangdangra tanü Ao oshi atema ABAM dang nungibo Ao Senden-i ang (ASLB) tali aroka nendaka inyaker ama ajiteter. ABAM aser arogo lenirtemi kechi bilemer.
Ao kin oshi atema ABAM aser Ao Senden(ASLB) mensem ka mena Ao oshi terenlok atema Mokokchung/Impur nung shisa lemsatep agiba jagi Ao Senden/ABAM tuluba/tilaba akümer masü, saka ibai ajanga Ao oshi jembirtem atema akhüm tuluba aser tesademba nung oshi renlokdaktsür dang asütsü. Tanü iba tapokji tuluka makümdang ABAM aser ASLB, telok ana tsüngda temulung lapoka pei oshi terenlok asoshi mapa inyaktsü tenüngdaktsü ta ajiteter. Takoktsüka asübo ABAM-i Ao oshi terenlok asoshi telemtetba ka agir kümsük atakzüka yur küm shia sen lemzükja ASLB den yaritepra, Missionary mapang nungi tanen makai yariba nükmen mesamai asüng Ao oshi terenlok shilem tajung agir asütsü.
Ao oshi terenlok mapa nung ajaki ajangshiba kaji zülumen nung ajurua aruogo. Saka ASLB ajanga adokba Arok Osep, 2019 kaket nungi medemdanga zülura, zülumen tsütsü khuret kanga tulubo masütsü südi.
Tanü Ao oshi wadang nung mamatettsüba maitsü lungzüngji:1. Ao Dictionary 1999, Prof. Renthy Keitzar; 2. Ao Osep 2005, C. Walu Walling; 3. Tetsü Meli, 2013, Tir Yimyim; 4. Arok Osep, 2019 ASLB. Itemji asütsü. Item dakji ajemdaker tanü Ao oshi melenshiyonga arudagi. Talisa Arok Osep nung mabensaba aser mayimjembatemji tarutsü nung tali tabensaba tayimjemba küma yanglushitsü kecha tasak masü.
Iba Osep nungji tongben ojangtem olasü densema adoktsübaji ajanga tamshirtem atema melamela-a zünga otettsü lenmang sayuogo.
Tanü Ao oshi jenjangji mera tasen ka agiloksemogo, aji NU ajanga Ao oshi B. A., nung azüngtsü temelaba agütsübaji alitsü. Ibaji tanü Ao oshi atema osangtajung rongnung tajungtibaji asütsü. Süra Aor Aotsürtemi B.A. tashi nung Ao oshi tongti süa agitsü tejangraba lidi ma. B.A. tashi nung Ao oshi agirtemji FAC, Mokokchung nung dang kaketshir ishika lir. Saka Mokokchung district nung aliba College-tem nung Aor Aotsürtem ajak Ao subject-ji tongti süa magitettsüsa tenokdangba kar ali asü?
Iba den ano Kohima aser Dimapur Govt. College-tem nung Ao oshi aginür kaketshirtem lir ma? Parnoki dang pei tetsü oshiji agidi süra, item dang sayutsü atema ASBL ajanga PGD in Ao Arangtet Tatidang kanga junga renemer alirtem yoktsü peria kar. Mesüra tatentep mapang item dang sayutsü atema nübu peria kar. Ibai 2020 nungibo mapa tenzüka aotsü kanga tongtibang.
Class 10 nung Ao subject Govt.-i agizükba apibo tang mapang yabo Ao oshia University level nung züngya alitsüba sür nung tanü asen mapang iba mapang tajungji malangzükteti süidaktsüogo ta sasaseta bilemer. Iba yagi asenok talangka mejanga liogo ta kuli sayur, Tanüa Ao oshi tatentep lenjem ka nung lir, Tamang yimsü, osaren telok balala, nung na dena alitsü akok, saka Ao oshi nungji telungjem ajanga maitsü ayak aser shisangren kar ta angatetra asenok ajak teka amteper asüng Ao oshi tejakleni anitsü apusodi.

Tasembuba nung Asüng Ao oshi Jenjang:
2020—– dangji Asüng Ao Oshi jenjang ta ajatsü akok. Yashi aser Tanü Ao oshi jenjang asadangba nungi asüng kechi inyaktsü ta tanü bilemdangtsü ya mapang tajung. O ka nung Yashi aser Tanü Ao oshi wadang nung shilem agirtemi pei pei tashi yari kanga meranga inyaka yutsüogo. Parnoki iba tashi ya danga inyaka meyutsü asübo asüng Ao oshi koba lenmangi ola.
Asüng Ao oshi atema tanü asen nükla aser mangdang kechi asütsü? Ao oshi terenlok mapa ya nisung ishika mapa dang asütsü asü, Ao oshi jembir Aor ajak mapa asütsü? Sentep kidang sayutsüngiba jangratema angar sentep temerbo ato kechisa jembiakana ta asüngdang nung ajak amadokogo ta langzü medem, tanübo temulung ajak jamesoa runga atua dener asüng kechi inyaktsü ta asüdangbo tashitsü kecha maka ama masütsüsa, ajaki langkabosa lemsatepba agi dang asüng Ao oshi lendi kati pungtettsü. Tebilemdangtsü atema tongmelang agi kar:
Mezüngbuba nung, Ao oshi University tashi nung agitettsüsa lenmang bushiteptsü Aor ajak nükla aser mangdang asütsü tenüngdaktsü ta ajiteter. Tangar jilo ajizüka benshitsüba dang nungi aseni asen oshi atema sentong tajung asameyanga inyakdi süra lenmang sadema kar ta bilemer. Kodang iba mapa ya takok ngua odir, idakji sentakba teinyaktsü jenti adoktsü.
Tanabuba nung, Ao oshi kenozülu dak sentakba ngua aser angashia aliba dang nungi kanga agi tali aseni mangashiba aser mangubatem ajak tatongi bendena rizüngtsü, tetsür aser tebur teka mapatem koba tanü putui mangazükteter/meinyakteter, itemji tanen makai angazükdakja, pei sobaliba takar kümdaktsütsü atema tang alir tantsü-tambutem dang asüngdanga parnoki inyakbaji menüngoka yur mapang balala nung sayutsü, aser itemji class balala nung agitsü kaket adoktsü.
Tasembuba nung, asen nisungtemi züluba kakettem, züluyutem, takok tashi bendena Kaketnang tajung ka nung rizüngtsü. Otsüolem tsütsü osetzü tapu balala bendena kaket küma adoktsü. Akhi tsüraburtemi amshiba oset-tsüset bendena Osetjenri nung yur alima dang sayutsü.
Ao kin Jungli Mongsen tetsür aser tebur sobutsü bendena sayu taktang nung bendentsü. Ao kin sobaliba aser loktiliba; Yimdenyimli yimsüsüba tarensen; akhi tsürabur yimsü aser amenbong; takar mapa aser arrür den raraba a.a. ta item ajakji tatongi bendener kaket yanglur class telemsa balala nung agitsü. Itemji mapa küma inyakdi süra tang ASBL ta aliba ya tapet Academy tenüng ka jateter inyak nungdang takoktsü asütsü. Kechiaser iba Academy nungjibo lenla ajak nungi züngsem tabensa shimer mapalem balala lemsar inyaktsüsa akümtsü. Iba ya Ao kini mapa kümteta inyak nungbo lanur aika toklang tenzükba mesüra mapang tataktet yur inyaktsüsa akümtsü. Yashi aser tanü Ao oshi asen lenirtemi iba jenjang tashi anir arua yutsü süra, asüng Ao oshi atema tangatetba tajungtiba agi pei tetsü oshi lentiti nung jajadaktsütsüsa telemtetba takang agir mapa inyaktsüla.