Atangji nai ashitsü; ibai taküm tzü angudak

~  Sashimeren Jamir.

Nisungtem aika teimla samar yangi arur, aji saka, item purji shi aser tanela nung taneptsü balala ngur aoba angudang, atangji, kü taküm nung tepelatibaji ibaji lir aser aji ni masü saka Tsüngremer sayatenya ajanga lir. Anungji, konang nüngsang ajak Pa nem agütsür ta adianutsür C. Alila Kichu, shiba Miracle Home Prayer & Counseling Centre Mokokchung nung Director lir, la den iba osangbeneri sensaksemdang lai lemsatep.
“Ali rongsen arulen tejangja maka”, aji saka, “takar Tsüngremi sayatenya ajanga onok nüngdaktem ajak peritsür aser tamang agi dang iba Miracle Home ya bener aoer” ta lai kuli agütsü.
‘Iba kidang tashitak tulu aser shi aser tanela nung mokokmein khuret tapu jenti bener arur, parnokji taneptsü anguba den tekümtet ngur aoba ngua süngmangseta pelar aser Tsüngrem tenüng asanger’ ta laisa ashi. Yilar, mozülar, ashikülaker, ashi-auer, temenen tanelai apurtem aser khuret balala bener arur, aji oda, “alimai maneptsütetba jenti Yisui aneptsüogo” ta laisa shisem.
“Shi kisüng nung mesüra yimya agi dang melenshibaji teperi makümer aser ibaji teti asoshi masü, saka temelenshiji atangji temulungjang taroktiba nungi adoktsüla aser ibaji Tsüngremi dang agütsütet aser tamangi dang akoker” ta laisa ashi.
Iba kidang arurtem teimba sentep ki mengudanger, lashiba melapokdanger, Yisu dak mangmangertem dang atenshir, item pur anishitsübaji temela masü, aji saka, parnok dak Tsüngremi sayatenya inyakba ngua onok tali tashi itshir aser ajungshir ta laisa ashi. “Tensa tia ajak nung Yisui onok pukümba ajanga marendaki tanü tashi Pa tenzükba wadang nung noktaka lir” ta laisa shisem.
Lai ajangshiba nungi kibongtem nung inyakdaktsünüba olen ka ashidang, “lanurtemi pei tsürabur den medemer amai ayimtsüla aser tsüraburtemia yamaji pei chirnurtemji tashiyim agi masü saka medemer amai anepalutsüla aser parnok den sensak asemtsüla” ta metetdaktsü.
Adianutsür Alila ya Chungtia nunger Tsüngrem tenzüker Rev. Chujang’er jala lir. La küm 10 asüdang Yisu ajuru aser lanuwa nungi Tsüngremi la amshi aser Pa tenzükba wadang balala nung amdaka arur külen 2006 kümto May ita iba ‘Miracle Home’ ya tenzük. MH ya metenzükdang 2003 küm la den Tsüngrem tanelai “Healing Centre” ka lapoktsü jembi.
Aji oda, sarasadema ataba mapang ka, taoba Ungma Village Council Chairman adianu Imolemba’r kibong den Tsüngremi jembia par kinünger telungjem indang ali kimung tasazük tulu ka tenla agütsü. Ibaji tetenzüker ser tsüngküm mongpu balala nung Tsüngremi adianu balala den jembia kisüjensü maparen aser nüngdaktem moaja ya tashi tongtetogo ta shia laisa tetenlar ajak dang pelaba metetdaktsü.
“Tsüngremi tsürabur maongka kü nem agütsü südi, anungji, Tsüngrem tenüng maneni asanger, aji oda, Yisu maru tashi samaa aliba pur kotaker senmanger kümdaktsütsü aritepa inyaker” ta iba osangbeneri asüngdangba ka langzüdang lai ashi.
MH nung inyaker Missionary Sünep Aier den jembidang, ‘lanuwa nungi samaba pur anir aruba wadang inyaktsü ni jangra aliba ama, ni iba mapa nung jangratema inyakdar’ ta ashi. ‘Yangi arurtem shi aser tanela nung taneptsü anguba ngua tali tashi itshir aser Tsüngrem tenüng asanger’ ta metetdaktsü.
Ano yangji inyakersa Missionary W.Nokong-i ashiba agi, “college azüngba mapang kaket shisatsü nung dang temulung agütsü aser alima tetoktepba agi dang sünger liasü, saka yangi arur külen chichiba tamang ainbaji ni meteter aser temoatsü jenti ngudaki” ta metetdaktsü.
Iba osangbeneri Alila tebu Rev. Chujang shiba arishi küm 97 lir, pa dang “jalai iba ama taneptsü angudak ki lapoka Tsüngrem tenzükba ya nai koma bilemer?” ta metetnüa asüngdangdang, ‘asen mulung masü Tsüngrem mulung, anungji, ibai alima matem tashi takok ngua aotsü moajang ta sarasadema alir’ ta ashi.
“Yangi amungba tajangzük aika rongnung Tsüngrem den tesendaktep tajung yangluba den ano Laishiba azüngtsü, sarasademtsü, ken atentsü aser shilem balala agitsü maongka angur aser nisung yimya balala den medemer yimteta kibong ka amai jangratema alir” ta osangbeneri yangji amunger ka den jembidang pai ajangshiba kar lemsatep.
Tang tashi nung yangi amunger adianutem temoatsü mengui aoba aikabo malitsü südi. Yangi tejangrar ajak asoshi kishi lapoka lir, khuret aser taküm kuli shinertemi arua mapang agitsü akok aser taneptsü aginertem asoshia yariteptsü mulunga lir ta MH ketdangertemi metetdaktsü.
Miracle Home ya Mokokchung town nungi kilometer 3 shi pilar Ungma yimpang süngküm ajangli Tuensang road anasa lir. Temulungertemi iba tesemji mashi mapang ka nung semdanga temoatsü balala agitsü akok. Atangji nai ashitsü, ibai taküm tzü angudak.