ATI-i sorkar driver tem atema sentong ayongzüka agi

Dimapur, September 27 (TYO) : September 26, 2016 nü “Training on Basic Courtesy” ta ser sorkar kübok driver tem atema sentong ka ayongzüka agi.

Iba sentong nung Secretary to the Government of Nagaland & Director, ATI, Lithrongla G. Chishi, IAS-i tajungshi o jembi.

Lithrongla-i driver tem dang pei tajungtiba agüja mapa inyaktsü ayongzük aser laisa ashiba agi, “Government service ji maongka ka ama mangateti, pei teinyaktsü khuret angateta inyaktsüla.”

Sentong nungsa Nagaland State Transport nungi, Er. Dzuvichutuo Khale-i ‘Technicalities of Vehicles’ indang onük jembidang, gari anepalutsü aser totzü aangtsü ayongzük aser Thejazelie Kire, S.I-i Traffic Rules indang jembi.

Kohima ama traffic kanga aliba jilatem nung gari driver temi traffic ozüng timi benshitsü aser talisa tanga driver tem nem ajizüka benshidaktsütsü atema sorkar driver temi traffic inykshi shitak amshitsüla, ta Thejazelie-i ayongzük.

Sentong nungsa Dr.Hovithal Sothu-i Basic Courtesy indang onük jembidang, kangta dang kara ainba loktiliba den tsüngsü medema anidaktsü tayongzükba agütsü.

Nagaland nung temelenshi nüngdaker aser tarutsü putu jungdaktsütsü atema driver temi ochimashi inyakyim agientsü telemtetba agi. Parnoki tali bendanga agütsüshitsür mapa inyaktsü, yimyatsüya tajung beneshitsü aser ochishia tenzüktsü tenangzükba agi, ta Deputy Director, ATI, Dr. Hovithal Sothu-i sangdong ka nung metetdaktsü.

Parnoki nangzükba ama ketdangsertemia pei mapa ochishia inyaktsü aser senotsü mesüra office maparen timi inyaktsü atema driver temi mepishia metetdaktsü. Parnokisa, office balala nung driver tem indang file tem mapang shitak nung ajishimtsü mepishi, ta Deputy Director, ATI-isa ashi.

Driver temisa district shia nung Vehicle Inspector tem shimtsü kechiyong ibaji ajanga parnok tali ajungmesotsü ta ashi.

Sentong tatem nung All Nagaland Government Drivers Association President, Neivisieto Rino-i o jembi aser pai Director ATI, Lithrongla G. Chishi, Course Coordinator, Dr. Hovithal Sothu aser ATI Staff dang pelaba metetdaktsü.

Iba sentong nung department aser district balala nung driver 179 tashi aden.