ATI nung Climate Change training agi

Dimapur, April 21 (TYO): Administrative Training Institute (ATI) Nagaland-i ayongzüka state nung department balala nungi middle level officers atema anogo ananü climate change training ka ATI Complex Kohima nung ayonga agi, aser iba training tanü April 21, 2017 nü tembangogo.
Iba training nung shisalen sayur tongti, Ura College of Teachers Education Kohima nungi Asst. Professor, Dr. Petevino Chase-i tsüngsang aser alima tzü-mopung melenshiba, Greenhouse gases, Greenhouse effect, alima tatsükba akümba aser itemji ajanga timtem aserteraksatsübatem indang jembia liasü.
Mezüngbuba anogo nung training agirtem dang Climate Change onük nung minute 20 indang video ka sayua liasü.
Climate change ya nüburtem tebilemtsü onük ka lir, anungji linük den International jenjang naprong nungi iba atema inyaktsüla, ta laisa ashi.
Climate change ajanga temelungjang tashidak, tangu sashiba timtem aser stroke buludaktsür aser malaria den dengue fever ama wara proker, ta laisa shisem.
Anogo ananü training nung department balala nungi ketdangsertem parnok 20 shi dena liasü.