ATI nung common induction programme agi

Dimapur, October 18 (TYO) : October 18, 2016 nü IAS, IPS, IFS, NCS, NPS aser 2015 batch atema allied service probationers ajak indang common induction programme agiogo.
Iba sentong ya Multipurpose Hall, ATI nung agi aser tongti tesemdangerji ATI Director, Lithrongla G. Chishi IAS liasü.
Lithrongla-i Common Induction programme indang temetettsütem ashidang, taoba mapangbo iba training ya ita ana atema agi saka tanü-asüng department temi mapang talanglang atema ketdangsertem meyoktetba agi hopta ana atema dang agir, ta metetdaktsü.
Public tenzükertem ta ozüng agi alenbangba sülen ketdangsertemi ajurutsü aliba tayongzükbatem asoshi shisalen angutsü atema Common Induction programme ya sabang tajung ka lir, ta laisa ashi.
Sentong nung Dr. Mazie Nakhro-i tajungshi o jembidang, ketdangsertemi civil service masü saka self service atema dang inyaktsü tebilemba lira, mapa meinyaktsüla, ta ashi.
Aikati sorkar mapa anguba atema pelar saka ibaji süoki ia mebilemer. Iba tangatetba ya melentsüla aser pei mapa nendaka inyaktsüla, ta Dr. Mazie-isa ayongzük.