ATI nung ‘Noting and Drafting Skills’ training ka agiogo

Kohima, July 15 (TYO): July 13-14 anogotem nung ATI nung department balala nungi Assistants atema “Noting and Drafting Skills” training agiogo, aser iba sentong nung department 8 nungi Assistants 50 dena liasü.
Noting aser Drafting Skills onük naprong nung Theory aser practical sessions agi, iba dak alia sendaktepa aliba onük File Management aser “Forms of Communication” indanga tesayuba agüja liasü.
Iba training tatembangbuba sentong nung Additional Director(Adm), Kevakha Kevin Zehol, NCS-i, nisung shiai inyakba mapaji Tsüngremi lemzüktsüba mapa lir, anungji ajaki ibaji mission mode nung inyaktsüla, ta metetdaktsü.
Paisa, “Assistants ya meimchir melungjang ka mesüka lir. Nenok ya Computer nung CPUs aser Data Banks ama lir. Anungji nenok ya kanga tongtibang. Nenok medenibo office mapa junga meinyaktettsü,” ta metetdaktsü.
“Naga nungertemia tangari inyakba ama inyaktettsü, kechiyong asenoki Indian Universities aika nung takok junga angur. Ajisüaka asenok temelungtetba shisatsü agi anünger,” ta paisa ashi.
Iba dak sendakba nung pai Assistant tem dang, nenok kong lidir liaka mapa nendaka inyaktsü aser küm 35 tashi tenzükba ajanga tatishitsü tajung yutsütsüla, ta ayongzüka liasü.
Iba sentong ya Course Coordinator, Dr.Hovithal Sothu leniba nung agi aser paisa shilem agirtem nungi telangzüba agütsüba nung ajemdaker osang tatsüka metetdaktsü. Item rongnung tongtibang karji “Training mapang ya tali atsülangtsüla”, “Practical classes mapang tali atsülangtsüla, “Item ama Training ya ita trok shia khenbosa ayonga akatsüla” aser “Gari anirtem atema-a Trainings ayonga katsütsüla,” ta liasü.
Ano Wb. Huto aser Kr. Ajungla natia shilem agirtem tenüng nung anogo ana tsüngda parnok nem aika angazükdaktsüba atema ATI aser course coordinator dang pelaba lemsatep.
Tatemsa mendenbubai tepela anküp o jembia liasü.