Atletico den Simeone tenangzüktepba tasen yanglu

Tsüklai/February 16, 2019 (Agencies): Atletico Madrid coach Diego Simeone-i, iba club den tenangzüktepba tasen yanglutsü atema tajungshiba tulutibaji asayartem ajanga lir, ta ashi.
Arishi küm 48 tain Simeone, shibai Atletico coach mapa 2011 küm December ita belenzük pai Brehostibarnü 2022 tashi inyaktsü asoshi tenangzüktepba tasen ka yangluogo, ta Efe news sangdong ka ajanga metetdaktsü.
“Club nung asayartem mechi nung ni tenangzüktepba tasen ka yangluogo. Onok renloka otettsü, ano onoki maneni tokteptettsü aser ibayongji nia toktepnüa akümer,” ta Hokolbarnü osangbenertem den sensaksemba mapang Simeone-i ashi.
“Ni tajungtiba agütsütsü merangtsü aser asayartem dang kanga pelar, kechiyong parnoki küm tenet tashi nungita aruogo,” ta Argentina nunger coach yagi ashi.
Simeone-i ashiba agi, Rayo Vallecano pur kanga tashi ita kümogo, ajisüaka Atletico puri takokba tashi inyaktsü ta coach-i fan tem nem tenangzükba agütsü.
“Rayo Vallecano pur team ka ama kanga junga asayar aser parnok indang stadium nung parnok kanga tashi ita kümogo. Iba asaya kanga toktepa asayatsü aser onoki aninüba leni asaya anitsüla,” ta paisa ashi. Atletico pur taruba asaya Rayo Vallecano den asayatsü.
Simeone kübok par club kanga takok ngua arudar aser ibayongji pai, asür Luis Aragones ajateta Atletico pur coach tem rongnung tajungtiba kümogo. Aragones lenisüba kübok iba club yagi title trok tashi kokteta liasü.