Atletico puri Juventus kokogo

Tsüklai/February 21, 2019 (Agencies): Bodhbarnü Atletico Madrid aser Juventus na Champions League last 16 asaya mezüngbuba leg Atletico puri goal 2-0 agi kokogo.
Asaya nung Jose Gimenez aser Diego Godin nati goal kaka idaktsüba sülen parnok quarter-final tongtettsü asoshi jenjang tajungba ka nung lir.
“Ano onoki kokjala makok. Ano asaya ka anunga lir aser iba asaya temela masütsü ta onoki meteta lir,” ta Atletico coach Diego Simeone-i asaya tembangba sülen ashi.
“Tia kaa onok goal asembubabo machi, kechiyong 2-0 yabo melenshidaktsütettsü. Onok ano taküm lir,” ta Juventus coach Massimiliano Allegri-i ashi.
Asaya ya Simeone-i aniba teloki akoktsü tetemsü liasü. Asaya nung Antoine Griezmann-i crossbar nung ken metsüloktsü aser kasa mapang nung VAR teyari meshiba sülen Juve pur pusema penalty ka magütsü aser Alvaro Morata-i tongoktsüba goal ka magi.
Juventus puri parnok asayartem wazüka ayutsü merang saka Atletico puri parnok asayartem kanga tasüita amshiogo. Simeone-i asaya nung Morata, Thomas Lemar aser Angel Correa melena liasü aser iba ajanga parnok nem tajangzük agütsü.
Ajisüaka Juve pur atema ano iba asaya akoktsü maongka lir, talisa taruba asaya Turin nung asayaba mapang nungbo Costa aser Thomas Partey naprongla masayatettsü kechiyong tenaprongla yellow card kaka chiogo.