ATM nung sen auyazüka agiba mapa nungi jenbua liang

Dimapur, August 10 (TYO): Tanü-asüng Nagaland nung nisungtemi ozüng anema ATM nung tangar account nungi sen auyazüka agiba mapa kanga bulua inyaker.
State adena orr telok pungui iba mapa ya inyaker aser parnoki Bank nungi teshimtet nübotem ta shia phone ajanga ATM card no, PIN aser tanga personal temetettsü amala asüngdanger aser iba sülen ashioktsür, ta SP(Crime) & PRO Nagaland Police, M. Tungoe, IPS-i sangdong ka nung metetdaktsü.
Item ashikülakertem jagi nisungtem dang parnok account update asütsü atema ta shia temetettsütem asüngdanger, saka bank temi kodanga itemji masüngdangtsü. Anungji, phone ajanga bank account indang temetettsü asüngdangyadang osang kecha mashitsüla, ta M. Tungoe, IPS-isa sangdong nung shia lir.
Public-i ibala mesükba call magizüktsüla aser memetetba nisungtemi phone ajanga item temetettsütem asüngdangra tekaratiba nung police nem metetdakjang, ta paisa sangdong nung metetdaktsü.