ATM sen auyaba atema police ketdangser ka apu

Rangia, October 26 (Agencies) : Taoba hopta Assam nung police station ka nung officer-in-charge-i ATM nung enoktsü aliba sen auyatsü tasa atongba atema aija puogo.

Iba nisung ya Bhupen Chandra Das lir aser pai sen lakh 9 auyatsü atema tasa atong. October 20 nü Moranjana anasa Nalbari branch nungi Baihata Chariali nung aliba ATM nung ayutsü atema sen bener aodang pai tasaji atong, ta Kamrup district Superintendent of Police, Indrani Barua-i ashi.

Das-i sen belener agency nungi security guard Paban Barman, agency nung inyaker Taijuddin Ahmed, Prasur Ali aser Iftikar Saikia nunger den külemi tasaji atong, ta SP-isa metetdaktsü.

Yashi Saikia apuba sülen iba inyakyim nung police ketdangseri shilem agiba kuli jungkai adok.

Sen bener aoba garijia samar aliba nguogo, ta Indrani Barua-isa shisem.

Anogo ishika tejaklen ATM auyartem Paban, Taijuddin aser Prasur nungertem police-i apu aser SP-isa ashiba agi parnoki auyaba senji kobii angutsü imlar.