ATMs nung sen 2000 atema hopta ana-asem shi agitsü: Arun Jaitley

New Delhi, November 12 (Agencies): Union Finance Minister, Arun Jaitley-i nüburtem dang, bank-i aotsü atema maritepdaktsüner aser aremzüka atadaktsüner, ta mepishiogo.
Paisa, sen melenba osang mesangdongdang yongi party kar nembo osang jelia metetdaktsür liasü ta jembiba osangji tiyazü, ta ashi.
Jaitley-i, “Sen lakh crore 14 shi circulation südar. Sen melentsüji manger sangwadangbo metembangtsü, ta tamasayongi onoki meteter liasü. Ajak peritsüsa sen peria lir. Iba ya mapatong tuluka lir, aser tang ang tetenzüker,” ta ashi.
Linük tesm ajungalen aliba ATMs nung sen 2000 note tasenba agütsütettsü atema hopta ana-asem shi agitsü. Ibaji metembang tashi sen 100 agizüktettsü, ta ashi.
ATMs tamasayongi kechiba meyanglushi ta asüngdangba langzüdang Minister-i, “Sangdong magütsüdang yongi ATMs ji meyanglushi, kechiyong Cabinet-i telemtetba magi tashi iba ya miim osang ka liasü. ATMs yanglushibaji tamasayongi tenzük asübo osangtsüsang proker lila, aser nükjidong amajok süla,” ta ashi.
Jaitley-isa, State Bank of India aser iba dak sentakba bank temji India nung aliba banks shilem 25-30 shi lir, aser parnoki anogo ana ser tesadang nung sen aika transaction süogo. SBI-ia sen crore 54,370 agütsüogo aser sen crore 47,868 agizükogo, ta metetdaktsü.
Paisa, “Tang tashi nung SBI-i nisung lakh 58 sen melentsüogo. Nisung lakh 33-i sen agizükogo aser sen inoktsürtemji iba dang nungjagi tiemba lir,” ta ashi.
Opposition party temi sorkar telemtetba aitsüba dak sentakba nung Minister-i, “Yimtenren party aika nungi tebilemba balala jembiogo. Karibo o mashii jembiogo. Yimtenren merüktettsü atema merangba mapa ajanga karbo mepelar,” ta ashi.
AAP tongti aser Delhi Chief minister, Arvind Kejriwal-i, July-September ita nung sen deposit aika süogo, kechiyong Ato kilonser Narendra Modi-i iba sangdong magütsüdang yongi par medemertem nembo metetdaktsür liasü, ta tai tongloktsü. Iba dak sentakba nung Jaitley-i, “September ita nung ang deposits atu, aser ibaji August 31 aser September 15 tsüngda Pay Commission arrears agütsüba ajanga lir,” ta ashi.