ATMs nungi senpak 200 agizüktsü atema ita 3 agitsü

New Delhi, September 03 (Agencies): Reserve Bank of India (RBI)-i hopta ka tejaklen senpak 200 notes tasen adokogo, ajisüaka senpak 200 notes tasenbaji ATMs nungi agizüktsü atema ano ita asem shi agitsü.
Bank karibo ATM company tem dang notes tasenba agütsütsü atema ATMs tendanga yanglushi tenzükang ta shiogo. Yaküm November 8 nü Ato kilonser, Narendra Modi-i demonetization sangdongba sülen linük nung ATM machines ajak yanglushia liasü.
ATM yangluba company temi ashiba agi, senpak note 200 tasen agütsütsü atema RBI-i ATMs yanglushitsü atema tang tashi nungbo tetuyuba agüja mali.
Parnokisa ashiba agi, bank karibo parnok dang ATMs machine nung sen note tasenbaji tendang tenzüktsü mepishiogo, ta metetdaktsü, kechiyong sen notes tasenba tasazükji tanga dang nungi khenyongi balaka lir.
Senpak 200 notes tasen ATMs nungi agütsütsü atema linük tesem ajaklen ATMs lakh 2.25 prong yanglushitsü asü masüar tang tashi nungbo osang mejangjar.
Osangbener den jembidang AGS Transact Technologies Limited Chairman aser Managing Director, Ravi B Goyal-i, “RBI nungi tetuyuba aruba sülen onoki ATMs yanglushiba maparen tenzüktsü. Sen tasenba note ya tang aliba senpak note tem dang nungi tasazük khenyongi balaka. RBI nungi tetuyuba aruba sülen onoki tasazükji apir ATM cassettes yanglushitsü,” ta metetdaktsü.
“ATMs nung machine yanglushiba maparenji anogo 90 tsüngda nungbo tembangtsü, saka kasa mapang nung nüburtemi ATMs nung timtem majurutsü (sen agizüktettsü). ATMs yanglushiba mapang nungjisa nüburtemi maneni senpak 100, 500 aser 2,000 agizüktettsü,” ta paisa metetdaktsü.