ATMs tesadang ka yanglushitsü atema hopta ka agitsü: Sorkar

New Delhi, November 16 (Agencies): Linük tesem ajaklen bank aser post office tem nung nüburtemi timtem ajangshiba mapang ka nung tanü sorkari, sen 500 aser 2000 note tasen agizüktettsüsa linük nung aliba ATM lakh 2 nungi tesadang ka yanglushitsü atema ano hopta kabo agitsü, ta metetdaktsü.
Ketdangser kati, nüburtem nem agütsütsü atema sorkari sen 500 notes peria menüngdar, ta metetdaktsü.
Tang ATM ajanga anogoshia timba agi sen 2500 agizüktetdar, saka ATM timbaka nung sen 2000 mesüra 100 note dang agizükteter.
“Sen 500 aser 2000 notes agizüktettsü atema ATMs shilem 50 yanglushitsü atema ano hopta ka agitsü,” ta ketdangseri ashi.
Honibarnü Union Finance Minister, Arun Jaitley-ia, linük nung ATMs ajak (lakh 2) yanglushitsü atema hopta asem agitsü, ta metetdakja liasü.
Ano külen tanga osang ka nung, sen tejen melenertemi anogo nung aiben melenba nokdangtsü atema teshimtet yimti kar nungbo bank nung inyakertemi sen agizükertem temeyong nung maidoktetba shiai nüloktsü tenzükogo.
Saru magütsürtem mesüra black money alirtemi parnok sen melentsü atema tai maket nisungtem anogoshia tarensen nung aiben nokdakdaktsür, ta Intelligenece osang ajanga metetdaktsüba sülen Mongolbar nungi sorkari shiai amshiba inyakyim ya tenzükogo.
Delhi nung SBI densema bank kar nung shiai amshir. Sorkar sangdong ka ajanga ashiba agi, sen agizükertem anogo nung sen aiben melenba nokdangtsü atema SBI kongsang 11 nung iba maparen tenzükogo.
Shiai nüloktsüba inyakyim ya tanga tesemtem nunga inyaktsü, ta RBI-i sangdong ka ajanga ashi.