Ato kilonser Modi-i Oil Company tekolakpurtem ajuru

New Delhi, Mongputeni/October 15 (Agencies): India nung gari totzü jenjang kanga atuba mapang ka nung tanü Ato kilonser, Narendra Modi-i oil company tekolakpurtem ajurua senden menogo.
Yashi New Delhi nung petrol litre ka nung sen 82.72 liasü, aser Mumbai, Kolkata aser yimtitem nung sen 88.18, sen 84.54 aser sen 85.99 liasü.
Local tax nung ajemdaker linük kübok tesem balala nung totzü jenjang balala.
Petrol aser diesel totzü yabo Goods and Services Tax saru küboki maiter.
Tanü senden nung Narendra Modi-i totzü adokdaktsüba linüktem aser totzü alizüka agiba linüktem na tsüngda parnership yanglutsü nüngdak, koba ajanga totzü jenjang ajemtsü, ta ashi.
Totzü company balala aser tentet balala nungi tekolakpur nisung 40 shi den senden amendang Modi-i, totzü aser gas market nung India ji tongtibang linük ka lir, aser alima nung totzü timtiba atsükba linüktem taresen jenjang asembuba nung lir, ta ashi.
Modi-i, “Totzü tazü jenjang atuba ajanga India ama totzü agiba linüktem rongenkettsüng nung timtem ajurur; iba ongdang sendakteptsü atema totzü company temi tongtibang shilem ka agitettsü,” ta ashi.
Kasa senden nung Union ministers- Arun Jaitley aser Dharmendra Pradhan na den NITI Aayog vice-chairman, Rajiv Kumar nungera dena liasü.
Kasa senden nung World Bank Senior Director, Riccardo Puliti-a aden.
Senden nung adener rongnungsa International Gas Union, Gazprom, Vedanta, Reliance Industries, Indian Oil, Hindustan petroleum, Petronet LNG aser American Gas Association densema company aser associations aika nungi tekolakpurtem liasü.
Tan ita tetenzüklen Union Finance Minister, Arun Jaitley-i excise duty (saru) totzü litre shia nung sen 1.50 ajema liasü. Iba dak alia oil marketing company temi-ia petrol aser diesel totzü litre shia nung sen 1 ajemtsü lemteta liasü.