Ato kilonser, Modi-i Parliament senden nung adentsüla: Opposition

New Delhi, November 28 (Agencies): Centre sorkari sen tamshidak anentsüba onük nung Ato kilonser, Narendra Modi senden nung adentsüla, ta opposition party temi takhangba agüja longkak aitba sülen tanü Lok Sabha aser Rajya Sabha naprong nung senden thinena liasü.
Tanü Rajya Sabha nung Congress MP, Anand Sharma-i, linük Temzüng nung Banking Act kübok nüburtemi pei sen agizükba temeten agientsü atema Ato kilonser mesüra finance minister nem tashi agüja mali, ta ashi.
Opposition-i tanü ‘Bharat Bandh’ ayongzükba sangdongba sülen tanü opposition party temi Parliament telung aser kima naprongla nung sorkar anema longkak aitba den külemi sen 500 aser 100 notes anentsüba onük nung o lemtepdak Ato kilonser, Narendra Modi adentsüla ta takhangba agütsü.
Lok Sabha aser Rajya Sabha naprongla nung aiben rongrong adokba sülen senden anaprong thinena liasü.
House anaprong nung Opposition party temi, Modi senden nung aden nung ang senden akatsü, ta metetdaktsü.
Opposition party temi House telung aser tema naprong nung longkak aitdang Congress Tir, Sonia Gandhi aser tatong tir, Rahul Gandhi nati anir party nung inyakertemi Raj Bhawan nunga longkak aita liasü.