Ato kilonser, Modi-i taruba ita Sri Lanka semdangtsü

New Delhi/Colombo, April 19 (Agencies): Taruba ita Ato kilonser, Narendra Modi-i Sri Lanka linük semdangtsü aser Buddhist calendar nung tongtibangtiba benjungmung UN ‘Vesak Day’ sentong nung shilem agitsü, ta tanü Sri Lanka nung tongti minister kati metetdaktsü.
May ita tanabuba hopta nung Ato kilonser, Narendra Modi-i Sri Lanka semdangtsü aser pai ibaji tang agi tanabenbuba linük semdanger asütsü, ta Sri Lanka Justice Minister, Wijeyadasa Rajapakshe-i metetdaktsü.
Modi-i semdangba mapang pai May 12-14 anogotem nung ayongzükba UN ‘Vesak Day’ benjungmung nung shilem agitsü.
“India Ato kilonseri linük semdangtsü ta shiogo,” ta Rajapakshe-i osangbenertem dang metetdaktsü.
2015 küm nunga Modi-i Sri Lanka semdanga liasü.
Buddhist nunger timba aliba linük, Sri Lanka-i Lord Buddha asoba, temeshi nisung akumba aser asüba anogomung nüngtem nung ‘International Day of Vesak’ ya ayongzüker aser iba mapang nungsa International Buddhist Conference-a alitsü, kong alima linük 100 nungi tejaoker 40 shi adentsü.