Ato kilonser sentong ‘Mann ki baat’ menokanger: EC

New Delhi, September 16 (Agencies): Ato kilonser Narendra Modi-i ita shia agiba radio sentong ‘Mann ki baat’ menokdanger ta Bodhbar nü Election Commission (EC)-i metetdaktsüogo.

Bihar nung assembly election agitsü mapang ana nung lia iba radio sentong ajanga election ‘model code of conduct’ anema inyaker, ta aija Congress-i iba anema takhangba agütsütsü ta osang angazükba mapang ka nung election ketdangser tentet tuluba EC-i tanü iba osang metetdaktsüogo.

EC ketdangser kati, iba sentong ajanga model code anema inyakba kuli bushitet nungang iba takhangba asoshi inyaktsü, ta ashi.

Ita shia iba sentong nung Modi-i radio ajanga onük aika jembir, aser taruba Mann ki baat sentongji tan Deobar nü lir.

“Cabinet senden aser Mann ki baat ama menokdangtettsü, ajisüaka Cabinet telemtetba mesüra iba sentong ajanga model code of conduct anema inyakba kuli ngura iba anemaji inyaktsü akok,” ta ketdangserisa ashi.

Ajisüaka iba sentong nokdangtsü atema Congress mesüra tanga party temi akhangba sangdong kecha angazüka mali, ta ketdangserisa ashi.

October 15 nungi tenzüka Bihar nung telemsa pongu nung assembly election agitsü aser November 8 nü vote azüngtsü.

Taoba Haryana assembly election mapang nunga Congress-i iba programme anema takhangba agüja liasü, ajisüaka EC-i ashishitsüsa kecha kuli magu, ta ketdangserisa shisem.