Ato Kilonseri Pathankot semdang

January 09, 2016 : Ato Kilonser Narendra Modi dang Pathankot Airbase nung tan tsükchir den raraba aser mita aoba yimya rasaa ashiba noksa nung angur. National Security Adviser, Ajit Doval,  Chief of Army Staff, General Dalbir Singh aser Chief of the Air Staff, Air Chief Marshal Arup Raha nungera kasa noksa nung angur.

Pathankot, January 09 (Agencies): Ato Kilonser Narendra Modi-i tanü Honibarnü Pathankot, IAF semdanga Air Force tekolaksang aser ketdangpurtem den tesüiba Honibarnü Pakistan kiralongrartemi amak asütsü, ta mulung melemi bilemba tensa asadangtepa liasü.
Modi iba tesem nung minute 90 kazüba mapang pa dang Honibarnü atalokba otsü tejangja aser iba tesem nung secrity tashi itshia ayuba metetdaktsü.
Air Force nung tekolakba, Air Marshal, Arup Raha aser National Security Guard ketdangsertemi Ato Kilonser, Modi dang parnoki kiralongrartem den raraba otsü map, anüng nungi tangokba noksa aser operation aodang tangokba noksa tem amshia rasaa ashi, ta defence sangdong ka ajanga ashi.
Pai tesem semdanger aoba sülen, PMO-i, “Tsükchir den raraba yimya agi temulung kanga süogo,” ta twitter ajanga metetdaktsü.
“Tebur aser tetsür shirnoki tsükchirtem den kanga tasü ita raraogo, parnok ajak dang kanga pelar. Parnok ajanga linük tejak tenteter,” ta twitter ajangasa lemsatepogo.
Modi-i iba tesem sema jajaba mapang kiralongrar parnok trok ket nungi prangpong aser injang aika ngutetba sayua liasü. Iba lendong nung India sepai parnok tenet asü.
Delhi nung office sangdong ka ajanga ashiba agi, Modi iba tesem semdangba mapang  NSG o BSF na nung tekolaktem, National Security Advisor Ajit Doval aser Army chief Dalbir Singh nungera liasü.
NIA nung ketdangsertemi Ato Kilonser den iba tatalokba nung bushisüngdang maparen indanga lemsatepa liasü.
Security temi iba tesem anogo asemnü tashi kanga junga mita aoba sülen tangbo tettsübutsü kecha mali, ta sandongogo.
Anogo pezünü kahtepba sülen Pakistan nung aliba Jaish-e-Mohammed telok nungi asütsü akok ta mulung melemi bilemba nisung trok tashi iba tesem nung security temi kahsetogo.
Iba tesem nung ano kiralongrar ali mali metetsü atema Army, NSG aser IAF indang Garud commandos tem lokteper mita oa liasü.
Defence Minister Manohar Parrikar-i January 5 nü kasa tesem semdangogo aser iba mapang pai, security nung tapok kar adokba ajanga tsükchir aittet, ta ashi.
Pakistan Ato Kilonser, Nawaz Sharif-i, iba lendong agütsürtem dak tapet inyaktsü, ta telephone ajanga Modi dang nangzükogo.
Iba tatalokba kuli aser osang tejangja Pakistan nema agütsüogo, ta India metetdaktsü.