Ato kilonserji UP-i shimtsü: Mayawati

Lucknow (Uttar Pradesh), January 16 (Agencies): BSP tongti, Mayawati-i BSP aser Samajwadi Party na nung inyaker ajak dang taruba Lok Sabha elections nung BSP-SP teloktepi takok angutsü atema inyaktsüla, ta metetdaktsü.
“Uttar Pradesh nung BSP-SP teloktepi takok ngura ni asoba anogomong atema sempet tulutibaji ibaji asutsü,” ta lai party nung inyakertem dang metetdaktsü.
Yashi la arishi küm 64 ajungba anogo nung Samajwadi Party Tir, Akhilesh Yadav-ia lar kidango oa la ajurua la nem naro den sü ka agutsü. Iba sülen tena tsüngda ghonda ka dak tali senden mena liasü.
Party ana nung inyakertem dang takok angutsüsa meranga inyaktsü mepishia Mayawati-i, Delhi (Centre) nung sorkar akumtsü aser Ato kilonser shimtsü atema Uttar Pradesh-i telemtetba agitsü, ta metetdaktsü.
January 12 nü Akhilesh aser Mayawati nati tariuba Lok Sabha elections atema UP nung BSP aser SP na loktepba osang sangdonga liasü.
2019 General elections jakdang Mayawati-isa sensaker backward Muslims aser tamangba yimsü nung minority tem atema menden wazüka yutsütsü atema jembidar.
Uttar Pradesh nung Congress-i shinga den-a meloktepi tokteptsü, anungji state nung party ajak atema Muslim nunger votes ji kanga tongtibang asutsü.