ATP Rankings: Yuki Bhambri 104 buba jenjang nung lir

New Delhi, September 29 (Agencies): India nunger tennis asayar, Yuki Bhambri-i tawa tembangba Taiwan Challenger asayamong nung tanabuba jenjang anguba sülen temaleni jenjang 21 tashi atutsü maongka ngua tanü Mongolbar nü adoktsüba tebur ATP Rankings nung 104 buba jenjang nung aliba osang jangjaogo.
Tan anguba jenjang ya arishi küm 23 tain Yuki-i tennis asayatsü tenzüker tanü tashi nung tebur singles shilem tarensen nung temaba jenjang angur lir.
Yuki-i Shanghai Challenger takok marok agizükba sülen, Czech Republic den asayaba Davis Cup nung jenjang tajung ngua shilem agiba den külemi, Taiwan Challenger asayamong nunga tanabuba jenjang indang takok marok agizükba sülen pai ajak agi rankings points 75 tashi ajangzüka tan jenjang tajungji angu.
Hopta 2 tsüngda nung temaleni jenjang 41 tashi atutsü maongka angusang, Yuki-i tan hopta anisüngzükba sülen taruba hopta asayatsü ayongba Tashkent Challenger nung maneni toktepa shilem agitsü renema lir.
Külem sensosanger, Somdev Devarman tsünglangleni jenjang 5 tashi aluba sülen tang 171 buba jenjang nung aliba aser Saketh Myneni-i temaleni jenjang 1 atsütsü maongka ngua tang 198 buba jenjang nung aliba osang jangjaogo.
Tebur doubles tarensen nung Rohan Bopanna-i merakzüi maneni tang 12 buba jenjang ngua lir.
Ajisüaka, Leander Paes-bo tsünglangleni jenjang 2 alutsüsa küma tang 35 buba jenjang nung lir.
Tetsür doubles tarensen nunga Sania Mirza-i Switzerland tsür, Martina Hingis den külemi lungjemer Guangzhou Open takok marok agizükba sülen la maneni World No. 1 aliba osang jangjaogo.