ATP Singles tarensen: Yuki Bhambri 125 buba jenjang nung lir

New Delhi, September 14 (Agencies): India nunger tennis asayar, Yuki Bhambri-i ATP Shanghai Challenger takok marok yashi Deobar nü agizükba sülen alima tennis asayar tarensen nung tang 125 buba jenjang nguogo.

Taküm 2015 küm tatem tashi nung Top-100 nung densemtsü alizüng ayusang, Yuki-i tan takok marok agizükba sülen points 80 tashi ajangzüka temaleni jenjang 20 tashi atutsü maongka anguba sülen tang 125 buba jenjang nung lir.

India nunger tebur tennis asayar rong nung temaba jenjang nung alisang, Yuki-i tan anguba ya pai tennis asayatsü tenzüker tanü tashi nung jenjang temaba angur lir.

Külem sensopur, Somdev Devvarman Shanghai Open 1 buba round nung tamakok ajuruba yong tsünglangleni jenjang 12 tashi lua tang 164 buba jenjang nung aliba osang jangjaogo.

Saketh Myneni-ia temaleni jenjang 4 atutsü maongka anguba sülen tang jenjang 195 buba nung lir.

Tebur doubles shilem nung Rohan Bopanna-i maneni jenjang 13 buba anguba sülen India’er tebur doubles asayar tarensen nung tang temaba jenjang nung aliba osang jangjaogo.

Bopanna sülen anidaka, 33 buba jenjang nung alisang, Leander Paes aser 95 buba jenjang nung alisang, Purav Raja nati tanabuba aser tasembuba jenjang ngua lir.

Switzerland tsür Martina Hingis den külemi lungjemer  US Open 2015 tetsür doubles shilem indang takok marok taoba hopta agizükla, Sania Mirza-a maneni tetsür doubles shilem nung World No. 1 aliba osang jangjaogo.

Tetsür singles tarensen nung 238 buba jenjang ngua alila, Ankita Raina-i India tsür rong nung temaba jenjang ngua lir.