ATP Washington: Stefanos Tsitsipas quarter-finals tongogo

Washington, Luroi/August 02 (Agencies): Tang tasayadak ATP Washington Open tennis asayamung tebur kija Brehostibarnü asaya round of 16 nung World no. 6 nung alisang Greek nunger Stefanos Tsitsipas-i Australia nunger Jordan Thompson madak 6-3, 7-6 (7/4) agi takok ngua quarter-finals-i iogo.
Arishi küm 20 tain Stefanos-i iba asaya mezüng set takok angu aser tanabuba set tatemlen tia makai Jordan-i zükloktsüba ball net nung temdakba ajanga Stefanos-i koka liasü. Iba asaya minute 99 nung tembang.
Tsitsipas, shibai taküm January ita Australian Open semi-finals nung Roger Federer tsükdakja liasü, pai October ita Stockholm, February ita Marseille aser May ita Estoril nung asemben tashi takok anguba sülen tang ATP title pezübuba akoktsü asoshi meranga asayadar.
Canada Masters final nung Rafael Nadal den Tsitsipas metsükdang, pai 2018 Washington semi-finals tongteta liasü aser hopta ka sülen top-10 nung alir ATP asayar pezü tashi kokteter rongnung asayar tanobutiba küma liasü.
ATP Washington Open quarter-finals nung Tsitsipas-i France nunger seed 10buba nung alisang Benoit Paire den asayatsü jangjaogo.
Kasa asayamung tebur kija asaya round of 16 nung Croatia nunger seed 6buba nung alisang aser 2014 US Open asayamung takok angusang Marin Cilic-i Canada nunger seed 9buba nung alisang Felix Auger-Aliassime madak 6-3, 6-4 agi takok ngua liasü.
Iba asaya nung arishi küm 18 tain Auger-Aliassime-i double fault 11 ben tashi mena liasü, koba ajanga pai shilem agiba nung temulung mepelaba lemsatep.
“Taküm küm tennis asaya aruba rongnung tanü asaya tamajungtiba liasü. Asaya mapang kü dak rasa ralem kecha meliasü, ibaji ajanga ni kanga aibelenogo,” ta Auger-i ashi.
Maneni, WTA asayamung nung US tsür wildcard Caty McNally-i külem US tsür Christina McHale madak 6-3, 1-6, 6-3 agi takok ngua quarter-final tongogo. Caty-i Taiwan tsür Hsieh Su-wei den quarter-final asayatsü jangjaogo.