Atsü nung süngdong memedemi aintsü tenzükogo

– Talitemjen Imchen.

Atsü ka nung süngdongnü tapu balala indaktsüdang, kar karaa ainba ajanga kar moksepadok ama, Nagaland nung political tsütsü tali karaa ainba ajanga, tanüngba tsütsütem moksepa odagi. Political party mesüra sorkar yanglur telok nung densem nungang, nüburtem litettsüsa tensa tiaji aru asü? Iba jagi, joko pei pei sempet balala tajungtem keter liaka, political nung odia asüyonga miima asüyonga densemer linüba meimchir ajak molungjang nung lir.
Tsürabur mapang nungi asen dak yimya tajung kaji, kati ka chiyung jatepba ya lir. Tesüiba mapangbo, kaketreju nung takok tajung ngur arura, medemer adianui tepela aser tenüngsang chiyung aja. Pei pei tata menden nungi temaba jenjang angudanga, tepela aser tenüngsang chiyung aja. Tawa tanübo joko item to chiyung maja kümogo. School-i modangyonga pei menden nung jenjang tajung menguaka, ruling party nung dena lir ta metetra, itemjiang chiyung ajar. Joko alima melenshia aoba amaji, tepela aser tenüngsang chiyung ajatsü melena, khuret aser tiemlatsü chiyung jateper asü ta nibo shisadanger.
Rongsen ketdangsüba tsütsü ji reprangdangra, Naga lima nungi Project balala yanglur Center dangi bener aoba ji, project ji dang takok ngua sen ji agizükner ashi, bener arua Nagaland nung iba jagi tera yanga, tejang danger achitsüsa bilemerbo ano nübur shisatsü jagi matonger südi? Center nungi project takok ngua bener aruba apibo Nagaland nung adokba agi asenok perir alitsüba. Aluyimba tsütsü nung reprangdangra, Nagaland sorkari tsünüsembongtsü atema tasa balala sayubatem, tanü tashi jangratema takok anguba mali. Tesayur ji tai asü tangazükertem ji taiar alimai asadangtsü nüngdaker. Ano rongsen akaba ji asadangra, Naga nunger takar ta züngshia alirtemji, election nung ken madok mesüra shiranga mozü kidangi ken aodang ji, sen temadoker aser sensaker kümadoker. Nagaland nung takartem ji kar dak alaka, sorkar tenzükba mapang bendenba dang asünung, rongsenkettsüng nung tejang danga mamshiteter.
Sorkari ketdangsüa inyakbatem nung tamakok ngua aruba putu ka lir. Tesasatsüksa, sorkar kimong tashi nija kimong küma agiadokba lir. Tang sorkar maden nija agi mozü ki amala lapoker, takok ngua bener oya aliba ji kanga junger. Itemjia tanaben sorkar indang küma kasa kibur jagi ketdangsüdaktsü nung, tamakokleni oa südaktsütsü menua maka.
Ano tanü Nagaland tensa ji reprangdangra, tesasatsüka state nung sempet akar artist tem samaa odagi. Talisa kaketzülur aser ken yanglua kensep adokertem ajemogo. Aor tashir kin padaka nung ya, küm nung Ao kaket tasen aser Ao ken tasen kar madoktetra kechi kin ta ajatsü. Ao lima nung bendanger kaket aser bendanger ken dang küm songtema tashi nungji renlokra, asangsang nung bendangeri moksepdaktsüba sayur. Ken bilemtsübo, tawa tanü Ao Oshi agi züluba kaket ji nai aser ni maliyonga kecha masü. Asüng asen chir mesüra semchirtemi alia azüngtsü akok. Kaket nung expire date mali. Saka tesasatsüka, tawa tanü technology ajongba agi, ken atenertem temeimtsü ka dang kümogo. Parnok sempet ji ken yanglua adoker ayoktsüba. Bendanger lima nungbo ken atener sempet akartem takar akümer. Saka asen lima nungbo ken yanglua adokner mali kümogo. Nisung kati kensep ka alirbo iba jagi medemertem ajaklen belentepa angateper. Naga nunger ji ken meimba kin asünung kenbo ajaki anganer aser ajak ket nung ken ji kar. Saka kensep alirbo mali. CD nungi copy agir ken angatsübaji melara aser ken tajung majung jembitsütsü ji pei pei tepangpu/tepangmechi nung yur angateper. Saka ken ka zülur, kensü inoka kongki ola balala inoka bushitepdangji, ashiko tepang agi meshitetba nübutsük, rongsen lalu aser tekoklok kangshiba ji tuluka lir. Süngdong tepen ajaklen ponger tejang dangpet ama ken meimerbo tajangzük angu, saka mapa meranga inyakerbo amajok nung tembanger. Ni ken atener ka asünungbo, pei sempet dakji tashi agi azüiter arüra jepla.
Asenoki meranga bushirbo angur, meranga inyakerbo angur ta jembia aruba aser bilemba to, joko mejembitsüba mapang kati arudagi. Yamaji Naga lima nung ken atener ajemogo. Ken atener malir ta asüdang ji, ken menüngokdak dokan kibur aser teinyakertem tashi timtem angur. Medemertem kensep ayokba mapang, nai sen agi malii, medemer nungi dang copy agir ken ji angara, Khristian ka asoshibo ibaji auyaba mapa asütsü aser na ji auashir temenen züngsem ka ama akümer.
Tanü Naga lima tia aser tebilemtsü ya, Naga nunger ajaki angateter mera tasen küma, shilem tajung magira, ayawara tenzüktsü menua maka. Alima nung akümlir asoshi ayawara dang nungi temaba timtem mali. Akok nungbo nüburtem ya political tsütsü tiyongtsü masü, saka atsü nung süngdongnü tapu ajak lirumedema intetba mesüka, kinük ajaklen nungi lirumedema lokti aintsü kija aser telok ajak khuret küma bilemtsü nüngdaker.