Atsüanem akatsüla

Tang mapangba ya Naga yimten latettsü jembiba mapang ka lir, anungji akok tashi senso ajaki pei bilemba temai adoka lemsateptsübaji kanga tongtibang asütsü. Iba tangatetba nung taoba hopta nung asenoki iba osangkaket nung ” NSCN-IM purtemi tang India sorkar den Naga yimten latettsü jembiba maparen nung ya tamakok angu nunga koma süla ?” ta asüba tasüngdangba nung shisalemsatepogo. Atangji, Naga yimten tebilemtsü agi mekongshiba aser matongba Naga nunger shinga malitsü. Naga yimten nüjiso asoshi raraba tongpang nung Naga nunger kibong aika nung mangyim jashi ajuruogo aser Naga nunger taküm aika lemtaogo. Naga yimten tebilemtsü aliba ajanga timtem, takoksa aser maksü ajuruba Naga nunger kibong aika lir. Aji oda, tanü Nagaland state nung bilemba ama terenlok mapa meinyaktetba timtem ya Naga yimten tebilemtsü aliba ajanga lir. Ibayongji, Naga nunger ajaki Naga yimten tebilemtsü ya tatembang küma telatetba kati arudaktsüner. Atangji, Naga yimten tebilemtsü ya yimten nüjiso manguba tebilemtsü lir, anungji yimten nüjiso angu nung dang Naga yimten tebilemtsü ya anentsü. Ajisüaka, tanü tensa Naga nungertem India nungi yimten nüjiso angutsübaji tamakoktsü amai kümogo. Iba jagi NSCN-IM teloki India nungi balaka razüka orr Naga nunger yimten nüjiso agitsübaji masü saka India kübok la den tesendaktep lia Naga yimten latetner amai angatetter. Atangji, tetenzük dang nungi yashi tashi Naga yimten nüjiso asoshi rara aser jembia aru saka tang ajungbena Naga yimten nüjiso mangutsü aser ibaji nüngdak mali ta ashitsübaji tasak.  Aji oda, Naga yimten nüjiso asoshi raradang Naga nunger taküm tenla agütsürtem aser parnok kinungertemi kechisüdirsüaka Naga yimten nüjiso dang nungi jenjang tilababo magitsüla ta nokdaktsüa akok, kechiyong ibaji atema par kinungertemi taküm tenla agütsüogo. Iba tesama aser takoksa ajuruba züboji ano tajem, anungji tangang atalokba ama nisung aika tejashi mesüngzükteti lir. Iba ama mapang ka nung NSCN-IM telokia Naga nungertemi bilemba noklang nung noklangbo mataloktsü ta metetdaktsüogo aser India sorkari Naga yimten latetba ajanga Nagaland kidanger state-tem artsü meyanglushitsü ta aiben kanga jangjaa shiogo. Aji oda, NSCN-IM lenirtemi ashiba ama, Naga yimten tebilemtsü latettsü asoshi India o Naga nunger na tsüngda yimten tashi lemdangtsü. Ibaji memenui ataloklanglang, anungji Naga nungertemi ibaji agizüktettsü asü magizüktettsü ta bilemdanga shisalemsatepba mapangji tang lir. Atangji, telok ajak longjemer nisung ajaki agizüktettsüsa telemtetba ka bener arubasa tajungba aser Naga nunger taginübaji aji lir. Ajisüaka, iba taginübaji alima nung nokdaka yur ita aginüba amai lir. Naga nunger linük tenzüker teloktem paikaya ka küma longjemtsübaji tasak, anungji asenoki matatettsüa akok. Aji oda, Naga yimten tebilemtsü latettsü asoshi parnok ajak longjem atatsü asü mesüra ka khen, ka khen ta jembia latet tajungba asütsü (?) ta bilemdanga telemtetba agitsübaji Naga nunger asoshi tongtibang teinyaktsü mapa ka kümogo. Koba südir süang,  Naga yimten tebilemtsü tatem küma telatetba ka dangi arudang, Naga yimten nüjiso asoshi taküm tenla agütsürtem mamai akümtsübu agütsütsüla aser parnok tenla kodanga mamatettsüsa nüngshi mapa ka inyaktsüla. Aji oda, Naga yimten tebilemtsü ya tatembang küma latettsü mechi nung Naga yimten nüjiso asoshi taküm tenla agütsür kinungertemi aibenlener telok aser kija kibong dang taidok agütsütsüla. Naga yimten tebilemtsü latettsü asoshi tenüngdaktiba nüngdakji taidok agütsüba ya asütsü. Taidok magütsütepi yimjung bushiba mapaji anemsü aser taidok magütsütepi yimten jenjang ka latetba nung lendong lir. India o NSCN-IM nabo yimjung nung Naga yimten latettsü asoshi terenemba tulu lir saka Naga nungertem rongnung kati ka yirutsütepba tamashi mapa ajak amadoker taidok agütsütep nung dang shitakba Naga yimten telatetbajibo arutettsü.