Atsüka aliba nungi adokang

Küm ishika Dawid Saul nungi jenshia aliba mapang meta kar nung atsükshia liasü. Pa taküm kümzüktsü lungpok nung ali. Idangji Tsüngremi pa lungpok nungi aser jenshia aliba nungi anitetter mitsa tulu kati anir aru. “Pai ni ano tesatemdak kati  anitet; Pai ni kümzük kechiaser  Pai kü dak temulung achi”(t.19). Dawid Tsüngrem mulungjang anasa aliba nisung ka liasü, aser Tsüngremi Yisu Khrista dak temulung achiba ama Dawid dak temulung chia liasü. Tsüngremi pa dang ashi, “Ibai kü meimba chir, shiba dang Ni temulung achir”(Matt 3:17).
Aiben asenoki Kibuba nung pelaa alitsü indang jembir. “Kibuba dak pelaang, aser Pai ne mulungi aginüba agütsütsü”(T. Ken 37:4). Ibaji inyaktsü tongtipang lir. Saka Tsüngrem asenok dang pelaaa alitsü koda? Asenok tsürapurtemi tanurtem aser semchirtem dang pelaba ama Tsüngremi asenok dang pelaner.
Tsüngremi asenok dang pela nung, Pai asenok kümzüker. Asenok tuluba kümdaktsütsü asoshi Pai timtema ajangshidaktsür. “Pai ni tesatemdaki anitet” (t.19). “Nai kü kübok kü mera asoshi sadema kümdaktsüogo”(t.36). Kodang Tsüngremi tesatemdaki anir, Pai tetsünga tuluba kümdaktsür. Saka idakji tanen. T. Ken 4:1 nung Dawidi ashi, “Ni timtem nung alidang nai ni yari.” Asenok tesatemdak yutsütsü asoshi Tsüngremi asenok kümzüker, idangji Tsüngrem sentsüwangshi asoshi asenoki tamang mera talangba meratsü. Küm ishika Dawidi atsükshishia, timtem, rishikangshi aser tejashi ajanga ao. Saka ibaji süitem. Pa nisung tuluba aküm.
Taküm nung tetendangba ajanga na tuluba kümdakjang, ilaa teküm. Tsüngremi na tesatemdak yujang, kong nai pa sentsüwangshi asoshi mera tulu agitsü akok.
Taküm tatitangji temela masü. Saka Tsüngremi mulungba nung tatitang shiaji nükjidong ka lir. Aiben na uludaktsütsü asoshi Pai aji amshir. Na shibanga lir ta nai bilemer asü? Tasü itang, Tsüngremi na iba nungi kümzüktsü pelar. Timtem mapangi ne tamang yanglur, nai dang itemji ne tamang asoshi Pai amshitsü melatsüla.