Auer süngsü tuluba !

Dimapur nung ki tululu ana nung Naga nunger sensakertem asoshi center government nungi aruba jang ‘Public Distribution System (PDS)’ ajanga alemtsü asoshi nangdena ayuba ngua nübortemi temulung melemteti oa reprangteter police-tem dang ashibaji tim teinyaktsü inyakogo ta bilemer. Asenok ama democratic lima ka nung nübortemi dena government yaria ochimashi mapatem anema mita meinyakra government ita sen chia mitkar mapa inyakertem kijaibo mereprangbutsü aser makoktsü. Iba tangatetba nung Nagaland police nung lenirtemi anir Nagaland tesem balala nung ” Community Policing” nüngdakba indang nübortem nem tangatetba agüja jajaba bilemtetter. Ajisüaka, sensakertem asoshi yokba jang asepba bag dena melentepa asepba puteta itemji bushisüngdangtsü asoshi police nem osang agütsürtemang puoka yura Nagaland asoshibo ibaji alima tatembang asütsü. Nagaland nung gari totzü nung kerosene enoker ayoker saka itemji mita reprangtsü purtemi merepranger, anungji totzü ayokertemi sademsadema asenok garitem nung kerosene  enoktsüba agi parnokbo takar akümer aser asenokbo akoksapet akoksar ta alidang, ACAUT telokiang puteta pudaktsüba agi tangbo gari totzü akhidang dang nungibo tajungba angur. Atangji, nübortemi bangdak nung alir ozüng amer ama mesüra police-temi inyaktsüba mapa meinyaktsüla, kechiyong iba jagi lendong aser takoksa tulubaang ajurutsüa akok. Ajisüaka, asen lima ama nung, kodang ozüng mali ama akümer aser kodang bangdak nung alirtem o ochimashi mapa inyakertem na longjemer nübortem tesensakba -tesensakba tiai idakja timtemdaktsür, kodang ochimashi inyakba mapatemang shitak amato aser ochishia inyakba mapatemang meshitak amato akümer, idangjibo pei lima aser nübortem meimertemibo ola madoki melitettsü aser item ama tim masüba mapatemji menokdang maremtsü. Ki arongdang fire brigade nüngdaker saka fire brigade gari arua ataa ki arongbaji teben sükleper reprangabo melitettsü. Ajisüaka, tanübo fire brigade maru tsüngda ki arongba mi tepsepa atartemang aija apu ama ACAUT purtemang tepuokdak yuogo. Shitakba agibo, tongtibang anogo Independence day aser Republic day ama nung sensosangertem rongnung shirnoki tasü itta policetemia manguba aser metongtetba tesem tonga oagi nübortem akoksatsütsüsa ochimashi mapa inyakba puteta metetdaktsür, parnokji tushia sempet agütsütsüla. Kong pei lima aser nübortem ajangzükdaktsütsü asoshi ochimashi anema tasü itta nokdakertem tushia amshir, iba lima azükarutsü aser tesünep nung alitsü. Ajisüaka, tanübo Nagaland nung shirnoki lokti sentong nung tongti tesemdanger amai arur sen aika agütsüdir parnokji dang tushir. Asenoki lokti aser arogo nem sen aika agütsübaji kong nungi agütsür ta meshisadanger. Ashiko, nübortem adenshia yur lokti senden nung sen aika agütsüba senji adenshia aliba nübortem atema yokba nungi aika alepzükba sen nungi teraka agizüka agütsür asütsüa akok. Asenoki asen lima tajung südaktsüner aser tanü majungyonga asüng lanurtem asoshibo yimji yimjung lima ka yanglua toktsüner. Ajisüaka, asenoki ochimashir tushi tashi aser ochimashi mapatem anema inyaker ajemrepa yutsütsü merang tashi asen lima nung temelenshi tajung ka marutsü. Iba lima nung nübortem auyi ponga aser lishi mezüa alitsü. Shisabolutsükaji, asen lima nung pen agi auyar aika kümogo. Item pen-temji AK 47 prangpong danga tesashiba lir. Item pen-tem jagi auyayonga mauya ama zülutetter. Aji oda, asen tsürabur shin o nung ‘Auer süngsü tuluba’ ta jembiba ama, item pen-temji aitsüra, parnokiang tesashiba aitsütsü ta asüba tia nung nübortem kangshidagi. Item pen-tem jagi nübortem alar kümdaktsüogo aser alartemi kibur anema ola adoktsü tsübur ! Item alartemji asenok !