Auer tapu aika

Nagaland ya Khristan lima ta masü saka auertem lima ta ajanungang tapetba asütsü amai kümogo. Tesem aika nung mozümora achirtemi yinsanginra aser chipo anpo dena auyaba agi kidang shinga malibo toktsür moutetba timtem asenok aikati ajurua alitsü. Item jagibo kidang kiset shiruru an aser ak chanu dena pua bener aoba otsü angashir. Iba ama mechimenu auyaba nungi tenzüker asenok kari light auyar aser kari tzü auyar ta mauyarbo mali ajak auer dang kümogo. Iba denji ano, asen lima nung sorkar office tulutiba tashi nung nübortem meyong rongsen auyaba otsü anogo shia angashir. Mozü achirtemibo miima auyar saka office nung inyakertemibo odia auyar. Mozü achirtemibo auyabaji tangar nem memetetdaktsütsü meranger saka office nung auyartemibo auyaba sen agi tapu tapu inyaka sayur. Aji oda, auersa asüyonga kari akseta auyar saka karbo auyabaji yimya kümer, auyaba sen nungi dena Tsüngrem nem tenla agütsür. Auyar külen Tsüngrem nem ter shilem aser temoatsü tenla agütsübaji nisung tsüngdang temenünütsüka aser Tsüngrem tsüngdang tesempatsüka asütsü. Iba ama senjibo sarasademba agia meshitettsü makoktsü südi ta bilemer. Iba ama onük ya nübortem rongnung khenkhenbo süoka shisa lemsatep nunga iba jagi asenok nem temelenshi tajung tilakabo bener arutsütsü. Ano, asen lima nung auyaba maparen rongnung gari auyaba mapa ya ka asütsü. Iba maparen nungbo India nung Nagaland ya kanga nüngtugu kümogo. Kibur tenla kidang mena alidang gari auyaa bener aoba, shishilembadak nungi auyaba aser kidang nungi dena gari auyaba osang aika lir. Ibaji dang masü saka tanga state nungi gari auyaa bener arua Nagaland nung ayoktsü aser Nagaland meyong gari number angutsübajisa temelaba, ibayongji gari auyar ajak Nagaland nung adenshir. Aji oda, tawa Kohima police-tem kijai sen crore 2.59 jenjang gari tapu balala 37 tashi putetbaji takok tuluka nguogo, anungji police-tem nüng asangtsü tetemsü saka ano külen alima tsüngdangbo taaktsüka lir. Ajisüaka shitikolak per agi meküpbangtet ta jembiba ama, auyaba gari agi asen yimti yimdong sünga senzübaji alima tsüngdang memiimtet. Joko, Nagaland nung gari kanga auyar aser gari number kanga melemelaa angur asünungji, tanga state nung Nagaland gari number enoker senzüa lira, auyaba gari amai dang repranger. Bendang lima nung tangar tsüngdang asenok noksaji ibaji lir. Kohima kija nung taoba ita pongo-trok ka tsüngda auyaba gari paikaji apu süra Dimapur nungbo kwikabo alitsü ta temulung nung tipmedemi bilemer. Ano, Kohima aser Dimapur nungbo tan amaji auyaba garitem teti miter, iba jagi aika putetogo aser gari auyaba mapatem terabo ajema akümer amai bilemer. Ajisüaka, tanga district aser sub-division-tem nunga auyaba garitem aikasa alitsü amai bilemer. Tanü asüng balaka asen lima nung tangalen nungi gari tejen alizüka bener arua ayokba shishilembaba mapa tenzükogo. Ibajia business tajung ka lir. Ajisüaka, item garitemji tanga state number asünungji, auertemi item garitem amaji bilemdaktsütsü asoshi tanga state gari number agütsür. Ibaji dang masü saka shitakba Transport office nungi junga mereprangdangi registration number agütsür asü mesüra nisung kari taila gari number yanglua ayokar ashitsü makok, saka Nagaland gari number kanga melaa anguba otsü kanga jembir. Iba jagi nübortemi Transport department nung inyakertem daka temulung melemi bilemer. Auer paika rongnung nung ano Nagaland Khrista asoshi ta ayima tashiyim agi sen saruba osang kanga angashir. Tanü asen lima melenshitsü nüngdaka jembiba tesemtemji itemji lir. Item tesemtem aser jakla melenshitsü asoshia auer takümtemji masü saka mauyar takümtemi mauya arema temelenshi bener arutsüla aser talisa tanurtem dang auyaba mapaji temenen aser maksü mapa ta angatetdaktsütsüla. Asenoki mauyara asen tanurtemi mauyatsü ta asüba tangatetba nung asenok ajaki tanübo tenangzükba ka agir ochishia lidi.