Aug 11 nungi NPPCL Workers Union-i NH 702 maneni mokdangtsü

Tzüdikong, August 11 (TYO): Nagaland Pulp & Paper Company Ltd. (NPPCL) Workers Union (WU)-i ayongzüka National Highway 702 (Amguri lenmang) Hogulbarnep 5:00 ako nungi tanen maka mokdangtsü tenzükogo.
Talangka nungi WU-i India Prime Minister dangia aser temaba bangdak (higher authorities) dangi mapang aben parnok timtemba indang aser mill dak sentakba nung takhangba balala shity ajanga tongtepratepogo, aji saka, telangzüba tajung magütsüba ajanga iba mokdang sentong ya ayongzüktsü lemtet, ta osang ajanga angazüker.
Iba amai ita talangka okronga aruaka, concerned authorities-i WU-i akhangba ama telangzüba tajung ka magütsür, anungji, tanga lenmang mali asünung iba ‘bandh’ ya ayongtsüsa kümadok.
Ita aika tebangi meshitetba timtem jenti ajurua arudaki aser ita 9 tashi ita sen mangur, ta NPPCL WU ketdangsürtem den jembidang parnoki ashi.
Iba den ano, Government of India-i iba mill asentenshitsü asoshi lemzüktsüba sen agütsüogo, anungji, WU-i mapang shia concerned authorities dang iba mill ya mapa küma tenzükshitsü asoshi nenshia arur, ta parnokisa ashi.
Parnokisa ashiba agi, iba paper mill tenzükshitsü asoshi Dec 2014 nungi mapa tenzük, aji saka, 2015 September ita nungto ajungbena dang anena lir. Anungji, iba dak sentakba nung bangdak dangi shity aiben züluogo, saka tanü tashi telangzüba mangur, ta metetdaktsü.
26th July 2017 nungto WU-i Hindustan Paper Corporation (HBC) Chairman cum Managing Director dangi parnok tahangba (memorandum) kar zülu aser ibaji langzütsü asoshi 10th Aug 2017 tashi mapang agütsü, iba anogo tashi nung par takhangbatemji mataloktsüra lungkak aittsü ta shity nungji zülur yok, ta angazüker.
WU NPPCL-i akhangbatemji itemi liasü; mezüngbuba takhangbaji – NPPCL asentenshi mapa takaratiba nung tenzüktsüla, tanabuba nung – mapa inyakertem nem ita 9 itasen magütsüi alibaji agütsütsüla, tasembubaji – tasür aser superannuation agi atonger employee-tem tangutsü tim aliba Gratuity & Terminal benefits takaratiba nung agütsütsüla aser pezübubaji – NPPCL nunga 2007 pay-scale-ji yakta mapa akümtsüla kechiyong tanga HPC unit nungi NPPCL-i deputation arur officer-tembo 2007 pay-scale nung itasenji achir.
Iba mokdang ya ajanga Mokokchung district dang masü saka kidanger district-tem dena timtem ajurutsü südi ta bilemer. Kechiyong Workers Union-i akhangbatemji mataloktsüra iba mokdang ya maneni aotsü parnok sentong lir.
Mokdang nung shilem agirtemji Tzudikong (Tinali) nungto adenshia lir aser gari kata mejajadaki sota lir, ta angazüker. Aji saka, kaket riju aser dokantembo bandh nungji mekongshir, ta osang ajanga angazüker.
Iba mokdang sentong nung nungita yariteper; Tuli Area Joint Council Forum, Tzudikong Adhoc Town Committee, Tzudikong Ao Students Union, Tuli Ao Students Union , Watsu Unit Tzudikong aser Tuli, parnok ajak dang WU NPPCL ketdangsürtemi pelaba metetdaktsü.