August 11 nü state tesem ajaklen nübodoka mapa inyaktsü

Kohima, Luroi/August 03 (TYO): Chiteni/July 27, 2018 nü Urban Development Commissioner & Secretary mendenbuba ser senden ka amendang Luroi/August 11, 2018 nü state tesem ajaklen nübokdoka mapa inyaktsü atema telemtetba agia liasü, ta ketdangsertem osang ka ajanga metetdaktsü.
Tzüngluruwa mongpu nung tzü atsüngdenba nokdangba den külemi anentsüh aluba nokdangtsü atema ai merüktetba den kilentzü aodak merüktettsü nükjidong nung nübodoka mapa inyaktsü atema ayongzükogo.
State nung Municipal Bodies ajaki ketdangsüa nübodok mapa inyaktsü.
Iba denji külemi Deputy Commissioner temi peipei District nung Village Councils/Ward Councils dang peipei tesem nung nübodoka mapa inyaktsü atema tetuyuba agutsütsü. Iba dak alia Rural Development Department nungi BDOs ajaki iba maparen nung yariteptsü.
PHE Department-ia parnok indang ‘Swachh Bharat Mission’ kübok iba maparen nung shilem agia yariteptsü aser sorkar department ajaki peipei office temeket merükteta amongtsü.
Deputy Commissioners aser Municipal Bodies ajak dang nübodok mapa tembangba sülen jana-ona ajakji junga bendener lenmang nung meyutsüi timi indoktsü atema tetuyuba agutsüogo.
Iba dak alia senso ajak ajak dang iba maparen nung shilem agia pei aliba temeket merükteta ayutsü mepishia metetdaktsüogo.
Dokan amenertem aser shishilembaba establishment danga pei shishilembadak jana indokba pongdang ayutsü aser lenmang nung jana meindoktsü metetdaktsüogo.
Nagaland temerükba akumtsü nükjidong nung senso ajaki shilem tajung agidaktsüner, ta kasa osang ajangasa metetdaktsü.