August 15 tashi nung Manipur nung ILP bill yanglutsü akhanger

Imphal, July 24 (Agencies) : Brihostibarnü Imphal nung Inner Line Permit System (ILPS) atema lokti senden ka ayongzüka agidang August 15, 2015 tashi nung state sorkari iba atema bill yangluba tembangtsüla ta telemtetba agia takhangba agütsü.
Iba bill nung Joint Committee on ILPS (JCILPS)-i onük pungu takhangba agütsüba adentsüla, ta senden nungsa telemtetba agi.
Manipur nung ILP inyakyim tenzükang ta takhangba agüja JCILPS-i anir lungkak aityonga aur.
JCILPS-i ashiba agi, Manipur nung nütsüng yongsükhi lakh 28 shi lir aser iba nung tenem aser lenden nung alir lisopurtem lakh 18 shi ka lir aser tanüngba ajakji bendangertem dang lir.
Lungkak aitertemi akhangba agizüka taoba Mongulbarnü Okram Ibobi Singh-i aniba sorkari ILP atema bill tasen ka yanglutsü telemtetba agi.
Iba bill yangluba luden nung mendenbubaji law minister Th Debendra Singh asütsü shimogo.
ILP atema ludeni ita ka tsüngda nung bill renemer assembly nung benoktsü atema state sorkari tetuyuba agütsüogo.
Sorkarisa ILP atema lungkak aitdang asüba Sapam Robinhood indang ken o bushisüngdangtsü atema telemtetba agiogo.
July 8, 2015 nü ILPS atema lungkak aitba sentong ka agidang police-i tenük amdaktsüba pongdang khadokdang Class 12 nung azünger Robinhood tejak nung kongshi aser iba jagi pa asü.