August 3 nü RS nung GST Bill benoktsü

New Delhi, August 01 (Agencies): Bodhbarnü Rajya Sabha nung GST Bill benoka jembitsü atema tanü sorkari renema yuogo. Iba ozüng nung temelenshi kar yanglushiba sülen iba bill ya opposition tongti, Congress den tongtibang yimtenren party ajaki agizüktsü ta imladar.
Goods and Services Tax (GST) Bill ya joko küm 10 jungüa jembia arur, koba ajanga linük tesem ajungalen indirect tax regime ka dang akumtsü.
“GST Bill Rajya Sabha nung benoka jembiba sülen agizüktsü atema Bodbar nü benoktsü lemtetogo aser onoki yimtenren party ajunga nem iba bill nungitdaktsüner,” ta Parliamentary Affairs Minister, Ananth Kumar-i ashi.
Sorkar osang ka ajanga angazükba agi, tanüa sorkari tongti opposition party, Congress den Left aser Samajwadi Party densema tanga party tem den senden ka menogo.
Union Finance Minister, Arun Jaitley-i iba bill atema senior Congress lenir, Ghulam Nabi Azad aser Anand Sharma na den jurila senden ka mena tangatettep kati arutsü atema jembiogo, ta kasa osang ajanga ashi.
Iba bill atema Jaitley-i CPI-M general secretary Sitaram Yechury-a ajuruogo, iba sülen pai Parliamentary Affairs Minister, Ananth Kumar o Lok Sabha Speaker, Sumitra Mahajan na ajurua liasü.