August 31 nü Manipur nung “Tribal Unity Day” amungtsü

Imphal, August 23 (Agencies) : Manipur nung activist telok kati August 31 nü “Tribal Unity Day” ta ser amungtsü ayongzükogo.
Yaküm September ita tetenzüklen Manipur nung ashishitep aketba bill asem atema lungkak aitdang nisung 9 tepsetba bilemteta iba anogo amungtsü. Tang tashi tasümang 9 ji ano meremi dang yua lir.
Yaküm August 31 nü Manipur Assembly-i Bill asem agizük saka tang tashi item Bill asemji ozüng meyanglu, kechiyong India Tir-i Bill ka sota ayu aser tanüngba ana yangluhistü atema meyipa agütsü, ta Deputy Chief Minister, Gaikhangam Gangmei-i metetdaktsü.
Bill asem anema Churachandpur tesem nung nisungtemi lungkak aittsü tenzük aser September 10, 2015 tashi lungkak aitdang nisung 9 tepset.
Lungkak aitba sentong ayonger Joint Action Committee (JAC)-i August 31 nü “Tribal Unity Day” amungtsü aser iba anogo nung tasür nem tetushi agütsütsü.
“August 31 nungi tenzüka hopta ka piyong sentong agitsü. Nisung aikati iba sentong nung adentsü imlar” ta JAC otongdar kati osangbener dang ashi.
Manipur sorkari Bill asemji magien tashi tasümangtem maremtsü ta tekong meranga yaküm asür mang 9 prongla hospital morgue nung dang yua lir.
Ajisüaka, Deputy Chief Minister-i ashiba agi, tang Bill kecha mali anungji lungkak aittsü nüngdak madoker.
Chief Minister, Okram Ibobi Singh-ia JAC dang Bill tem nung lisopur anema aliba onüktem tuteta shiang ta ayongzükogo.
“Tang tashi nung nisung shingaia onüktem tuteta mashi” ta senior advocate Khaidem Mani-ia ashi.