August ita BRD Medical College, Gorakhpur nung tanur 290 tashi süogo: Principal

Gorakhpur (Uttar Pradesh), August 30 (Agencies): August ita kija nunga Gorakhpur nung aliba Baba Raghav Das Medical College nung tanur 290 süogo, ta tanü Principal, PK Singh-i metetdaktsü.
Paisa, tanur 213 neo natal ICU nung asü aser tanur 77 encephalitis ward nung asü, ta ashi.
Medical college nung tanur jenti asüba dak sendakba nung Singh-i, August 27 aser 28 na nung tanur 37 süogo, parnok rongnung tanur 26 neo natal ICU (NICU) nung aser tanur 11 encephalitis ward nung asü, ta metetdaktsü.
Taküm January ita iba college nung tanur 152 asü, February nung tanur 122, March nung 159, April nung 123, May nung 139, June nung 137 aser July ita nung tanur 128 asü, ta paisa ashi.
Principal-i ashiba agi, tanurtemji timtem balala agi shiranga liasü, aser item rongnung anojungi tanur asoba, temang touzük tali ajemba, jaundice, pneumonia, menatepba tashidak balala aser encephalitis tashidak densema liasü.
“Shirangertem tekaraba nung anir aru asübo aika kümzüker lila,” ta Singh-i ashi.
August 13, 2017 nü Uttar Pradesh Chief Minister, Yogi Adityanath-i iba tatalokba nung aibelenertem nem temerenshi tulu agütsütsü, ta metetdaktsü.
Hospital nung oxygen maliba ajanga August 7 nungi tenzüka tanur aika süogo.
“Onoki state chief secretary kübok committee ka tenteta BRD Medical College nung tanur aika asüba aser oxygen agi anüngba kuli bushitsü tuyuogo. Aibelener nem temerenshi tulu agütsütsü,” ta iba mapang nung Yogi-i metetdkja liasü.
Ano külen Centre sorkari Gorakhpur nung sen crore 85 indoka regional medical centre ka tentettsü ta sangdongogo. Iba centre nung tanurtem indang tashidak balala indang research agitsü.
Joko küm aika Uttar Pradesh nung Acute Encephalitis Syndrome (AES) aser Japanese Encephalitis (JE) tashidak agi nisung aika asür.
Item tashidak agi tamajungba kongshiba district temji- Gorakhpur, Maharajganj, Kushinagar, Basti, Siddharthanagar, Sant Kabir Nagar, Deoria aser Mau lir.