Augusta Westand chopper ken o sorkar kaktettsü: MoD

New Delhi, April 28 (Agencies): Brihostibarnü Defence Ministry-i, AugustaWestand helicopter aliba ken o nung ochi kaktettsü atema sorkari inyaktsü, ta metetdaktsü.
Sangdong ka ajanga Ministry of Defence-i, “Iba ken o nung ochimashirtem aser aibelenertem ozüng matsüngdangi anir arutsü atema ajak inyaktsü,” ta ashi.
“Iba atema ya mapang kanga agir, kechiyong tongti aibelener kar linük nung mali,” ta Defence ministry-isa ashi.
Ano külen iba ken o nung tanüa BJP-i maneni Congress Tir, Sonia Gandhi arishia BJP tongti, Amit Shah-i la dang iba ken o nung süpokrem ajanga tajangzük angurtem tenüng agüjang ta ashi, ajisüaka Congress-i, iba ken o nung tenüngtem agütsütsüpurtemji bushisüngdangba agency tem lir, ta ashi.
Iba ken o nung Italian High Court-i obendang agütsüba nung densema alitsü südi ta bilemsang aser Sonia Gandhi indang political secretary, Ahmed Patel-i, “Congress bangdak lenirtemi süpokrem agia mali aser tai tongloktsübatemji tajemdakdak maka,” ta ashi.
Iba ken o atema yimtenren party tongti ana aitsütepba mapang ka nung osangbenertem den jembidang BJP Tir, Amit Shah-i, yashi Sonia-i iba ken o nung lai tsübua mali, ta jembiba atema aitsüogo.
Shah-i, “Lai ashibaji shitak aser ibaji ajanga item ama ochimashi ken o yimjak nung temai adoker. Ibaji ajanga National Herald ochimashi ken o atalokdanga, nai (Sonia) shinga metsübur ta jembi. AugustaWestland ken o tema adokdang nai shinga metsübur ta jembir. Ni la dang ya shiner- Bharatiya Janata Party nungbo onoki linük Temzüng aser ozüngtem tsübur,” ta ashi.
Shah-isa, “Gandhi-i iba tangatetba melenshitsüla aser nüburtem dang, kechiba Italian court-ibo süpokrem agiogo ta ashi, shibai senji agizük, aser shirnok tai ajanga, item kuliji ashitsüla,” ta ashi.
“Italy nung tepuokdak alirtemji süpokrem agütsürtem asü ta ni la dang asüngdanger. Süra süpokrem agizükertemji shirnok. Iba mapang nung shirnok sorkar tashi nung liasü. Parnoki kuli agütsütsüla aser ochiji jungkai adoktsütsüla. Ibaji linük nüburtem nem metetdaktsütsüla,” ta Shah-isa ashi.
Yashi Sonia Gandhi-i, iba ken o nung la aser party lenirtem nem tai tongoloktsübaji tamendakdak kecha maka, aser ibaji BJP-i nisung tenüng menüktsütsü merangba ka lir, ta shiogo.