Aung San Suu Kyi Myanmar Foreign Minister akümtsü akok

National League for Democracy (NLD) yimtenren telok lenila, Aung San Suu Kyi (Abelen)-i Naypyitaw nung tentetba Myanmar parliament ki tonga aodang agiba noksa ka yangi angur. (Naypyitaw, March 22)

 Naypyidaw, March 22 (Agencies): Myanmar Tir tasenba, U Htin Kyaw-i aniba sorkar tasenba nung National League for Democracy (NLD) yimtenren telok lenila, Aung San Suu Kyi nem Cabinet minister menden bendaktsütsü lemtetba osang ka NLD teloki tanü, Mongolbar nü metetdaktsüogo.

Küm aika nung tang mezüngsüa nüburtemi shimba yimsüsürtemi tentetba Myanmar sorkar nung Suu Kyi-i foreign minister menden abentsü maongka angutsüsa sentong renemba osang angazükogo.

Linük temzüngi memelaba ajanga lai Tir menden mebentetaka, lai Tir tasenba ajanga Myanmar madak yimsü asütsü tenangzükba olen ka Nobel sempet agizükla, Suu Kyi-i taoba mapang metetdakja lir.

Myanmar parliament speaker, Mann Win Khaing Than-i tanü yimjak nung zünga sayuba NLD telok nungi cabinet menden abentsü asoshi shimer yimsüsür 6 rong nung Suu Kyi tetsür yimsüsür kija aliba osanga jangjaogo.

Suu Kyi-i foreign ministry aniba den külemi, tanga mapatonga anitsü renemba osang ka NLD otogndar, Zaw Myint Maung-ia tesülen metetdaktsü.

Cabinet menden 18 abentsü asoshi NLD teloki yimsüsür tenüng 15 dang benokba ajanga Suu Kyi-i foreign affairs, education, energy aser Tir office mendentem abentsü akok ta aikati bilemtsü tenzükogo.

Britain kübok Oxford nung züngtetla, arishi küm 70 tain Suu Kyi-i Britain nunger den kibong akümba den külemi, lar jabaso anapronglai Britain senso agia aliba yong lai Myanmar Tir menden abentsü temeten mongutettsüsa jenjang tamajung ajurua lir.