New Delhi, August 28 (Agencies): Taoba mapang linük Tir, APJ Abdul Kalam nem akhüm tetushi agütsüba temaitsü kobi melii Delhi nung nüngtugu lenmang, Aurangzeb Road agi pa (Kalam) tenüng melentsü, ta tanü AAP tongti lenir aser Delhi Chief Minister Arvind Kejriwal-i ashi.
“Tenüngsang agütsür. Aurangzeb Road agi APJ Abdul Kalam Road ta melentsü atema NDMC-i tang telemtetba agiogo,” ta Kejriwal-i twitter ajanga ashi.
Ano külen BJP nungi East Delhi MP, Maheish Giri-ia twitter ajanga, iba telemtetba agitsü pusemba atema MP ajak dang pelar, ta metetdaktsüogo.
“Aurangzeb Road agi Dr APJ Abdul Kalam Road ta melentsü asoshi onoki nüboyimba nung medemer shirnokisa onok nungitogo, nenok ajak dang pelar. Aurangzeb Road nüngja melentsü atema iba nüboyimba nung Social Media ajanga shilem agir medemer ajak dang pelabaji ni o agi rasatsü makok,” ta paisa ashi.
Aurangzeb Road agi, APJ Abdul Kalam Road ta melentsü: Delhi CM Kejriwal added by asungba on
View all posts by asungba →
You must be logged in to post a comment Login