Aurora, Illinois nung nung civilian pongu khaset

Aurora, Tsüklai/Feb. 16 (Agencies): Chicago tezülen Aurora, Illinois nung warehouse ka telung nung prangbong bena alir nisung kati Hokulbar nikongdang nisung pongu khaset aser police pongu yirutsü, ta police temi ashi.
Iba lendong agütsüsang ya arishi küm 45 tain Gary Martin lir aser Henry Pratt Co. warehouse nung prangbong akhaba osang angashir police tem iba tesemi oa khatepba mapang pa khaset, ta Aurora Police Chief Kristin Zimen-i ashi. Parnok ya ghonda ka shi khatepa liasü.
Nikongdang 1:30 ako (par mapang) meta tasazük square foot 29,000 warehouse oa atongba den külemi police dak injang khaloktsü, ta Zimen-i osangbener senden ka nung ashi. Martin ya iba warehouse nung mapa inyaka liasü aser company ajanga pa mapa nungi Hokulbarnü anentsüba sülen nisungtem dak akha, ta police ajanga ashi.
Parnokisa ashiba agi, yirur alir police pongu ya anasa aliba mozü kidangi anir ao aser ana trauma centers-i anir ao. Iba lendong nung asürtem ya police temi Hokulbar aonung tashinung jangjaogo saka kinunger akhumtsübua asürtem tenüng ya mesangdong.
Bureau of Alcohol, Tobacco, Firearms and Explosives, FBI aser Illinois state attorney indang office teyari amshia Kane County ajanga bushisüngdang tenzükogo, ta police temi ashi.
Zimen-i ashiba agi, iba nisung yagi Smith and Wesson prangbong ka bena liasü saka pa tenüng nung register süa ali asü maliar mejangjateti lir.
Osangbener senden ka nung jembiba mapang Aurora Mayor Richard Irvin-i, “Tanü ya yimti nung tejashitsü agi sünga aliba anogo ka lir. Küm aika linük tesem balala nung kasa tensa asenoki ajangshiogo. Asen dak atalokba ya tali tamajungba,” ta ashi.
Illinois Governor J.B. Pritzker (D)-ia sepaitemi kanga karaa telangzüba agüja azüdokshi tali matalokdang nokdangtetba asoshi tenüngsang agüja liasü.
US Tir Donald Trump-ia, “Aurora, Illinois nung sepaitemi mapa tajung inyakogo. Timtem ajangshia alir aser parnok kinungertem den asükhu lemsateper. America nenok den lir!” ta Twitter nung zülutsü.